TINULIS EDI

wis dakcathet ing
telenging ati
nalika angin ketiga
sumilir
ngronce impen-impen
tanpa tepi
esemmu sing ngujiwat
anjalari rasaku kadya klelep ing segara
madu
prasetyamu wis taktulis
edi
muga selawase ora cidra
ing janji.

 Bojonegoro, 23 September 2013

DALAN BENER

wiwit sikil jumangkah
kudu maca bismillah
sadawane dalan
akeh sandhungan
iku wis dadi sandhangan
urip pancen
kebak pacoban
sing wigati kudu pinter
milih dalan
aja nganti nerak
paugeran
eling tansah eling
marang dhawuhe gusti pangeran.


Bojonegoro, 02 Maret 2012

KEMBANG NEDHENGE MEKAR

kembang nedhenge mekar
ing plataran ati
ngrembuyung ngrembaka
menehi pangayoman saka gemrisik angin
ing kalane nyangking hawa
panas
anjalari adhem lan resep
jroning dhadha
muga wae kembang ora
ambyar
kesaput dening mangsa
tansah semi lan peni
ing saben wektu
ora kepangan mangsa
angambar ganda wangi
resep ing pandulu
dadi kembang kang merak
ati
tansah anglamlami.

Bojonegoro,29 Nopember
2014

SLIRAMU GOROH

Kembang melathi
rumesep amrik ing telenging
ati
mbokmenawa panjenengan
krasa
lumantar samirana
kang ngelus rasa
mancala rupa
datan wujud karti
nelangsaning jiwa ginawa
sepi
miyar miyur kaya pupus
godhong gedhang
ati mlumpat-mlumpat ora
bisa anteng
kaya tletik banyu udan ing
dhuwur ron tales
nyata sliramu wis
goroh
lan gorohmu wis
ngrubuhake apa wae sakujur angga
kapitayan kabuncang ing iline samirana.
yagene sliramu goroh?

Bojonegoro, 20 Maret 2013

DLUWANG KLAWU

Rupa jenar sinangling
leledhang asung pepeling
wengi kang sepi
nyawur aruming melathi
nyebar ganda wangi
takgurit kekidungan
lumantar kapang sing mrada
ati
wewayanganmu tansah
ngrenggani pikir
lelamisan asmara
rinonce
kebak wisa
nyangking goreh nunjem
ros-rosaning batin
tinulis klawu ing dluwang
kenangan.


Bojonegoro,02 Januari 2012

UDAN GRIMIS

udan grimis ing plataran ati
tumetes nyegerake
gegodhongan lan kembang
uga mekarake kekudhupan
sing sauntara alum
kanyatan sing kudu
takprangguli kudu bisa maca
kahanan
kang mbranangi ati
pager sing dadi wates
wis nyimpen wewadine ati
marang grimis sing mung
teka kala-kala
wis takbisikake yen sejatine
ati iki nandhang kapang
kasimpen edi ing telenging
ati.


Bojonegoro,10 Agustus 2014

SUMARAH

Manut ujare kandha
urip iku mung mampir
ngombe
mula ngombea banyu
bening
lan jumbuh karo kahanan
dhiri
aja nganti weteng
blendhing
kudu sabar ing manah
dilakoni kanthi sumarah
lan sumundhe marang
pesti
sing wis ditata gusti.

Bojonegoro/28 Nopember
2014
2 jam · Disunting ·

PRASETYA TUHU

isih kelingan kandhamu
nalika mbiyen ngucap prasetya tuhu
aku lan sliramu bakal
selawase bareng lumaku
mecaki dina-dina nganti
kaki-nini
tresna kang suci tinulis edi
tinatah ing wit gedhang
sepet lan gedhang kluthuk
mangkono pepindhane urip
bebrayan
pindha wit gedhang
urip sepisan kanggo woh
sepisan
tansah rukun gegandhengan
tanpa crah
tanpa pasulayan
muga-muga diijabah Gusti
Pangeran.

Bojonegoro,28 Nopember
2014

PALAGAN PANGURIPAN

Yen urip iku papan
pandhadharan
mesthine kudu duwe
kekuwatan
kanggo tameng nalika ambyur ing
palagan panguripan
owah gingsire kahanan
aja nganti ngilangake
keyakinan iman
maneka warna kedadeyan
bisaa dadi panuntun tumuju ing
kadhewasan
mula sing sregep sinau
senajan nuwuhake tatu lan
kecepit wektu
tetep jumangkah
ing madyane margi mugi
gusti amberkahi.


Bojonegoro,28 Nopember
2014

UDAN WAYAH ESUK

Langit njenggureng
peteng angendanu
sesawangan dadi samar-
samar
dalan mung katon njlarit
kinemulan pedhut
angen nglangut nglambrang
ing jembare tawang
muga wae iki ora udan
kasangsaran
kang nyangking dom saka
langit
anjalari kutahe luh
udan wayah esuk
aku sedheku ing ngisor wit waru
ngrantu pepadhang sing
bakal mbusek
sakehing tatu.


Bojonegoro,20 Oktober 2014

BANJIR

sapa sing bisa ngalang-
alangi
nalika banyu mili golek
dalan
uga nerak watu lan wit-
witan
angin tansaya nyurung
playune
amber ing endi panggonan
tanpa milih papan lan
kahanan
banyu migunani mring
sedaya isi bumi
nanging uga bisa nggegirisi
merga saka polah tingkah
sing ndrawasi
banjir bandhang
tanpa bisa kabendhung
nerak omah lan tetanduran
uga kewan-kewan akeh dadi
korban
iki salahe sapa?
banjir mung
nipakake sesambate umat.


Bojonegoro,21 Oktober 2014

ELING

Ron garing sing gogrog
saka pang kae
mratandhani wis tekan
janjine
yen wis wayahe ora ana
sing bisa dadi pepalang
dimar sing madhangi jembare rasa
wiwit surem
wis kelangan cahya
tanpa bisa nggondheli
eling tansah eling
kita kabeh bakale budhal
mula enggal padha lelumban
nindakake kesaenan
ngebakna amal kebecikan
kanggo sangu ing akherat
kang sakwayah-wayah
tinimbalan gusti pangeran.


Bojonegoro/28 Nopember
2014

MAMPIR NGOMBE

tangan kumlawe ing
antarane godhong garing
kumleyang gogrog ing
pangkon
nalika mecaki dalan simpang
sing ngridhu pikiran
mbacut apa leren?
umpama mbacut wedi tatu
umpama leren bisa kaku lan keju
endi kang kudu takpilih?
iba senenge yen rembulan
kae kirim tengara
aku kang lagi mandheg mangu
mlaku ing dalan panguripan
kebak pilihan abang lan biru
muga ana wektu kanggo
golek sangu
ing donya amung mampir ngombe

mula tansah takwulang jiwa
lan ragaku ing dalan bener
mugi Gusti tansah
amberkahi.


Bojonegoro/28 Nopember
2014

EBUN ESUK

mecaki dina-dina
nggiring sakehing rasa
tansah ngrenggani liring netra
nyangking pangentha
ngronce panjangka
nalika ebun esuk
nelungake rasa kapang
tanpa umpama.


Bjn/nop14

SANGGAN

yen sambat kabotan
ya becike diselehake
ana jogan utawa dhipan
murih entheng rasane
pikiran
adoh saka sawan.



Bojonegoro/28 nopember 2014

AJA JUMAWA

iki salahe sapa?_
yen padha duwe gegayuhan
luhur
yagene dolanan wisa
aku lan kowe mung
sakdrema ngronce ukara
sing mesthine duwe
tatakrama
bebarengan natah edine
tugu sadawane wektu
mbokmenawa mbesuk
kanggo tenger anak putu
aja ngayawara
aja jumawa
sing tanpa guna
mesthine nglenggana kanthi
kebak rasa
yagene manjelma lading
landhep nunjem kalbu.


bojonegoro/ 28 nopember 2014

PANJANGKA

mecaki lurung cilik ing iringan omah
taktulis sedya ing jembare
rasa
bun gilar-gilar ing godhong
lumbu
nyata pangilon anggit kang
ginelar
atiku sumendhe marang
karep kang tinatah edi ing
tugune wektu
kringet dleweran sadawane dalan
prasasat tanpa wates
mili ing punjering sukma
panggah dakenam
panjangka
sing ngrembuyung
kekanthen niyat suci
lan tresna-MU

CATHETAN

Gurit-gurit iki takkumpulake
dadi buku muga bisa dadi
buku salah sawijining buku
pindha kembang kang
nedhenge mekar, senajan
durung kagolong kembang
kang ngganda arum. Sakawit
amung kepengin nglipur ati
lan luru maremeng ati.
Muga-muga ora nuwuhake
rasa cuwa tumrap para
maos.
Buku iki uga taktulis
minangka tandha tresnaku
marang wong tuwaku
sakloron kang ngukir jiwa
ragaku kang wis swargi,
yaiku Bapak Supardji lan Ibu
Mudiyati.
Lan uga dakpisungsungake
marang Kangmas Suprayitno
Spd, M mpd, garwa kinasih
kang tansah nyengkuyung
kanthi setya tuhu, nuwuhake
rasa tresna lan bekti jroning
atiku.
Uga kanggo anak-anakku
kinasih,Akbar Fahreza
Putra,Airil Rizky Yunanda
lan Devta Ahsya Malika

Bojonegoro,20 Nopember 2014
Lestari Sahsa Malika

BIODATA PANGRIPTA

Lestari Sahsa Malika utawa Denok Tary, lair ing Bojonegoro,
16 Pebruari 1973 seneng nulis wiwit taun 2010,
rupa geguritan lan saperangan wis kapacak ing majalah basa jawa.
Lelumban ing jagad sastra lan dadi anggota PSJB
(pamarsudi sastra jawi bojonegoro) wiwit taun 2012.

Pendidikan sekolah sing
dirampungake yaiku:

1.SDN Sidobandung 1
kec.Balen Bojonegoro lulus
taun 1985

2.SMPN 1 Balen Bojonegoro
lulus taun 1988

3.SMEA Negeri Bojonegoro
lulus taun 1991

nganti seprene mapan ing
desa ngadiluhur kec.balen
Bojonegoro.

ING GARIS PAUGERAN

Dakaras esem ngujiwatmu
lumantar pecahaning
sorot rembulan
ing selaning gegodhongan
gilar-gilar madhangi nala
ing pang-pang mega
cumenthel warta wigati saka
atimu
daktampa kanthi kebak rasa
lan gemrisike gegrumbulan
mbisikake panandhange jiwa

takkekep perih kang nunjem ati
senajan dalan iki
rumpil lan kebak eri
kita kudu tetep lumaku
lan tansah bisa nyipati
Gambar-gambar dlamakan
ngisor-ngisoring
Garis paugeran

Kembang arum dalu
ngelingake prasetyamu
kang wis ginulung wektu
kalungse lan klawu.

19 November 2014

WARTA SAKA ATI

liwat e-mail iki
dakkirim warta saka atiku
apa wis kokbukak
nganti seprene durung ana
pawangsulan
aku mung kepengin ngerti
apa isih ana rasa kapang

wacanen kanthi seneng
kaya aku nalika nulis iki
senajan kudu daksempal
pang wit jati
kareben ora ilang kapitayan
sing takduweni
pitakon tansah nguleng
apa wis bosen
yagene amung meneng

ahh..aku kok wedi
yen kokbusek aksara kang
wis tinata.

19 November 2014

MENENG

saiki ora ana kledhange
saiki ora ana swarane
saiki ora ana kaendahane
dahana sing mawa wis
adhem
meneng lan lerem
sing ana mung semplahe
rasa
nunjem tumeka ati.

211114/lsm

ANGIN

apa aku kudu ngoyak
playune angin

angin tetep angin
ora ngerti apa sing
dikarepake
isih takanti tekane
ing pinggir kembang
desember
sing suwe wis ora ana
pawartane.

211114/LSM

KEMBANG

Kembang ing taman tansaya
resep sinawang
senajan keterak angin rina
wengi
isih panggah kumanthil ing
gagang
mekrok ora gogrok dening
semliwere kumbang.


211114/lsm

Atur Pangiring

Jumedhule buku Kembang Nedhenge Mekar karyane Lestari Sahsa Malika iki minangka tandha yen ing Kabupaten Bojonegoro tansah lair anane generasi penerus penulis sastra Jawa.
kabupaten Bojonegoro mula dikenal minangka gudhange pengarang lan penyair sastra Jawa kang kejaba sregep nulis ing majalah-majalah basa Jawa uga padha nerbitake buku sastra Jawa wujud novel, kumpulan crita cekak lan kumpulan geguritan kaya karyane Lestari Sahsa Malika iki.
Ing buku iki, sawetara geguritane ana kang wis nate kepacak ing majalah Jaya Baya apadene ing Panyebar Semangat. Sawetara liyane durung nate kakirimake menyang majalah Jawa.
Para penulis Bojonegoro yaiku JFX Hoerry, Djajus Pete , Sri Setya Rahayu, Yes Ismie Suryatmaja , Moch. Makloem , Nono Warnono , Gampang Prawoto , Herwanto , Nardi , Yonathan Raharjo, Kang Zen lan liya- liyane.
Penulis wanita ing Bojonegoro kang luwih dhisik lelumban ing jagading penulisan sastra jawa yaiku Sri Setya Rahayu iku kang kejaba nulis crita cekak uga sregep nyerat geguritan wiwit taun 1970. Lagi muncul penulis wanita maneh sing nerbitake buku Kembang Nedhenge Mekar iki kang dedalem ing wewengkon Kecamatan Balen, Bojonegoro.
Cacahe penulis wanita ing endi papan pancen mung sethithik banget yen ora kena diarani langka.
Mula saka iku, muncule Lestari sahsa Malika iki mujudadake kabar kang nyenengake tumrap perlune generasi penerus penulis sastra Jawa khususe ing Kabupaten Bojonegoro.

Bojonegoro, Nopember 2014

Djajus Pete
Pengarang sastra

SADAWANE WEKTU

Kijenan tanpa rowang lungguh ing pelataran nyawang pucuk pring montang-manting jejogedan ing semiliring angin ing kana kangenku temangsang kabulet benang sutra kang alus lan wulet ing sadawane wektu ora bakal methet ing pucuk pring ana esem ngawe-awe atiku tansaya kebanting- banting embuh kapan? bisa tumiyung semandhing. Lest_sm/23 Agustus 2012

KEMBANG KANTHIL

Kembang ing plataran sawetara tanpa siniram garing tan ginape nganti seprana-seprene alum rontog godhonge brindhil kaya urip kepencil ketiga ngerak sambate ngelak ngeres dening bledhug keterak angin tansaya montang-manting nyidham tumetesing banyu udan ora kanyana ana grimis esuk sore katon seger trubus godhonge njenggelek... mekrok kembange ngganda wangi dadi kembang kanthile ati. Lest_sm/30 agustus 2012

KECANTHOL

Pucuk slendhang kecanthol ing petengan suwek katon ing pepadhang taktangisi mbrebes mili nglangut ing pandulu perih dening dom kang anjalari tatu takcabut dom iki senajan isih nunjem ati kanggo dondom pucuk slendhangku sinambi ngudal bolah kanggo ngrajut pucuk slendhang kang bedhah. lest_sm/ 12 nopember 2012

GURIT KATUR MITRAKU SMP

GURIT KATUR MITRAKU SMP Pedhut esuk tumangsang ing obahe gegodhongan nyawang kang lumaku ngoyak playune wektu nasak panas ing palagan nyandhung landhepe jaman miyak riwis wayah udan aku tansah kelingan bocah-bocah cilik kang nate uber-uberan ing jembare plataran smp kang dadi kenangan ngukir impen lan gegayuhan banjur saiki padha ana endi? nganti seprene ora ana pawartane ana endi papan dunungmu? apa wis lali nalika ngerek gendera lan sedya sineksen bapak lan ibu guru kang satuhu bekti ana crita kang rinakit mbiyen ing sakawit senajan wis kecepit ing dawane dina lan dhuwure anggit mitraku.. iki dina wis nyata slirane keraya-raya nglangkahi kutha necep ilmu natah panjangka sawise ninggal dhampar tuwa saiki bocah cilik wis dhewasa kabeh wis mungkur katon panguripan sami makmur salam kapang tansah katur dhuh..delengen kae jembare langit biru kaya rasa kekadangan kita tansah pinaes esem senajan ing kalane langit ora rupa biru nalika srengenge wis angslup nanging ora bakal gawe peteng ing memitran tetep edi dadi suluhing ati embuh kapan bisa reoni kaya dina iki atur pambagya lan endahing crita patlikurtaun kawuri wis ngukir prasasti sumimpen edi ing telenging ati sugeng lelayaran ing jagading samudra panguripan muga ing warsa ngajeng bisa pinanggihan sinambi ngronce pandunga gusti tansah amberkahi. Reoni SMPN 1 balen alumni 1988/100912

KEMBANG TERATE

nalika sore semendhe ing pucuk kembang terate gegodhongan ngawe-awe delengen kae kangmas... eseme kembang terate tansah ngujiwat kumambang ing beninge telaga biru wanci ratri,esuk,awan lan sore apa ta sejatine sing kudu dingerteni ing kene? kembang terate pancen peni kaya-kaya aweh pralampita marang awake dhewe yen ta wong urip mono kudu tansah andhedhipe ora mung dadi pepaes ing endahe pandulu muga kita bisa nulad pakertine kembang terate tansah ngabekti marang gusti ndedonga mugi Allah Swt tansah paring kanugrahan ingkang lumintu tumprap kita muga-muga aamin yaa roball aalamiin. #lest_sm /12 Nop 2014

KAPANG

Kapang tumangsang

ing pang-pang pring ori
gemrisik gegodhongan
ngudhal sepi

lelamunan ngulandara
batin tansah kandha

aku kudu bisa
ngliwati rasa iki

rasa kapang
kang tanpa pinggir.

Penjebar Semangat
No.44 / 3 nopember 2012

KEMBANG TRESNA

Kaendahan rasa iki
takgurit ing tegal nala
kembang-kembang tresna

tinandur asri
maesi
ing alam pangimpi

mbabar arum
puspa wangi
semi
ing ros-ros sukma
dadi prasasti edi
kaukir jroning esem
prasasat gusti
kladuk paring kanugrahan

senajan mung winates
jroning ngimpi.

Penjebar Semangat
No.49 /8 desember 2012

TAMAN GEGURITAN

Tinandur asri

ing tegal maya

taksiramsaben dina
takgelar ing larik-larik ukara
mujudake ana endahe nala

guritku wiwit kembang
katon trubus sinawang

dakajap bisa ngrembuyung

mekar angambar
arum..

saben mangsa.

Panjebar Semangat
No.4 -26 Januari 2013

SLENDHANG UNGU

pucuk slendhang ungu

kecanthol ing petengan
suwek.....

katon ing pepadhang

taktangisi mbrebes mili
nglangut..

ing pandulu

perih dening dom
kang gawe tatu

takcabut dom kang nunjem
kalbu

kanggo dondom
pucuk slendhangku

nanging ora ana bolah

kang nyocoki ing manah

sing bisa ngrajut
slendhang sing bedhah.

#lest_sm /15 Agustus 2014
pukul 9:19 ·

TAMAN KANG ENDAH

nalika sepisan ketemu
ing kene

ing taman guritan
aku lan panjenengan
adhep-adhepan
pandeng-pandengan

banjur keket salaman
ing angete eseman
ing korine taman

sing tansah menga
daktulis salam lan gurit edi
kanggo panjenengan

pinaes kembang-kembang
mekar
lan ibere kupu-kupu
katon ngresepake lan bingar

ing gapura taman iki
kula ngaturaken
salam memitran
maturnuwun.

#lest_sm/5 September 2014
pukul 9:40 ·

ING PUCUK PRING

nalika lungguh kijenan

dheleg-dheleg ing pelataran
nyawang pucuk pring
sing montang-manting

ing kono kangenku
temangsang

kabulet benang sutra alus
kang wulet

ing sadawane wektu

ora bakal methet
taksawang maneh obahe
pucuk pring

kangenku tansaya
kebanting-banting

embuh kapan?
bakal tumiyung semandhing.

#120914
14 September pukul 14:07 ·

SANGU LELADI

awan-awan jejagongan

ngandhani apik ora slengek'an
kena diwaca yen lagi
songgan

nuturi ati lan pikiran
ben tansah adhem lan
nyaman
adoh saka godhane setan

urip iki dudu dolanan
mula sing tenanan
nindakake dhawuhe
pengeran

ngibadhah manut aturan
miturut hadist lan al-qur'an

muga kita sedaya slamet
dunya dumugi delahan..
aamin yaa roball alamin


15 September pukul 14:11 ·

SEPI

ing ngisor godhong pring
jenengmu takgoleki

ing pang-pang garing
wartamu takenteni

nalika cendhela kamar
menga

semilir angin ngelus
rambutku

ing tritis kasepen

godhong palem
ngawe-awe

takentha astamu
kang ngranggeh
nelungake kangen.

#lest_sm /sept14

SANGU LELADI

Ana sing sambat
urip wis direwangi polah
nganthi kaya kekehan
(gangsingan)
meksa isih
kecingkrangan

yen urip iki kaya
kekehan
kudune diputer
sing banter

supaya pancet
jejeg lan anteng
merga yen mandheg
biayasane rubuh
yen alon mesthi lakune
sleyoran lan
sempoyongan.

28 September 2014 pukul 11:10

BENANG LAN LAYANGAN

ing ara-ara amba

nalika ketiga ngerak

bocah angon
ngundang barat gedhe
ngundha layangan

aku mesem

krungu tembang kekidungan
pepayon langit biru
rinengga mega sesulak
jingga

srengenge nyedhaki angslup
layangan isih anteng
mbrengengeng

tangan-tangan kasar ngulur
kenur

anteng sowangane
iki kang tinemu
ing desaku...

ngudang
benang lan layangan

enom tuwa suka parisuka

isih taksawang jembare
tawang

benang lan dluwang
oyak-oyakan

atiku ayem
desaku katon tentrem.

#denok/sept14
28 September pukul 15:38 ·

JARE SIMBAH

akeh-akehe wong iku
seneng banget yen
dialembana

kamangka pangelembana

iku bisa njlomprongake
ing kanisthan..

njur biayasane nuwuhake
rasa pamer lan sombong

ngendelake
kaluwihane..

kamangka
kanyatan satemene
durung mesthi padha
karo sing dikandhakake
wong liya mau.

30 September 2014 pukul 10:48

TINATAH EDI

isih katon ngalela

gumawang njejuwing ati
rinuket sepi sepa

sinempyok kembang trebela

sumimpen ing papan wingit

watu-watu pengkuh
ing pinggir jurang
aku wedi

taksawang ngisor jurang

peteng dhedhet lelimengan
ilang kapitayan

mecaki dalan rumpil kijenan

isih takgegem

suket teki kang dadi seksi

nalika ngenam prasetya

senajan nglinthing lan
garing

esemmu isih tinatah ing
kekayon

kebak sewu panjangka

takusapi tumetese luh

kelingan nalika aku
sumendhe ing dhadhamu.

#lest /okt14
8 Oktober pukul 9:18 ·

KEMBANG ISIH MEKAR

kembang padha mekar
ing plataran

kembang mawar
kembang alamanda
tawa esem sumringah

senajan ana rasa judheg
ngebaki jroning dhadha

pancen kudu dakrengkuh
kanthi raket

kareben cahyaning ati
sumorot ing gegedhongan

sadhurunge garing
lan pang-pang bakal rapuh

kepangan mangsa

saben wektu
saben mangsa
tansah sumunar

senajan abot kaya ngapa
ora perlu ngaruara

lan akeh sesambat

awit kembang sore
isih mesem

ing platarane ati.

#bda /okt14
3 Oktober pukul 16:29 ·

AJA SENENG DOLANAN

dunya iki papan ampiran
kanggo golek sangu mbesuk
sowan gusti pangeran

mula salugune wong urip
ora usah kakehan polah
aja seneng dolanan
lali dununge kebecikan
malah nguja kesrakahan
sing tundhane keblasak ing
luwangan

manungsa iku bakal
ngundhuh kang tinandur

sapa wae....
salah bakal seleh
anggak bakal klenggak
kementhus bisa kebenthus
sombong mesthi kebeglong
lan sing ijir bakale kacicir

bisaa dadi wong pinter
nanging aja keminter
supaya urip ora keblinger.

bojonegoro,nov 2012

WIS KUSEM

iki dudu paukuman
iki mung palereman
kang lagi sanjan

gregete rasa

krentege ati
iki mung pepindhane ngimpi

ing margi
kang kebak cobi

atis kinudangan wengi
oyak-ayik mlintir ing
kekesing ati

wewayangan larik-larik
sesalipan waspaku

kaya wis kusem
sinempyok awu

luntur...
sinempyok lamur

wis kusem
kucem...
tanpa esem


PANJEBAR SEMANGAT
NO.28 JUNI 2012

KEMBANG GARING

Nggagas tumapake rasa

anggit kang sumlempit
dadi bebundhel
saobahe laku

kaya wis ora betah
anggonku ngampah

mecaki sadawane lurung
sepi

tanpa wates

jroning ati
tansaya ngeres

wis sayah

anggonku nggondheli
tumetesing waspa

kapitayan kari samenir

mabur ilang

kaya kembang garing
kabur kumleyang


Lestari Sahsa Malika
JAYA BAYA NO.41 Juni 2012

JOGAN GARING

hawa panas ing ketiga dawa
melet-melet nyebar dahana

sakojur angga garing
krasa sesak ngebaki dhadha

ing kalane isih kuwawa
mesem
takumbar kutahe kringet

sing tansah nelesi jogan
garing

senajan sepa

muga isih akeh rasa sukure
kanggo jiwa lan raga
tansah takbisiki

isih ana kanugrahan
saka gusti

kuwawa ngilangake
lungkrah lan sayah

nalika gumlethak
sumeleh ati

nlesepake rasa pangrasa

bungah lan susah
ing panguripan.

#lest_sm /okt14·
27 Oktober pukul 18:46 ·

DALAN PAVING

Biyen nalika aku cilik
sadawane dalan iki
rupa galengan

yen pinuju wanci udan
budhal sekolah sepatu dadi
cangkingan

durung ana listrik
yen sinau kekancan ublik
uga swara jangkrik ngerik

yen bengi bubar ngaji
ndhepipis pengin nonton
tivi
ing terase mbah kaji

padha ngenteni serial
boneka si unyil

gegojegan
poyok-poyok'an

tanpa rikuh
ing kalane uber-uberan

ngoyak konang

saiki wis beda
omah-omah wis rapet
sawah kari bisa dietung driji

yen bengi wis padhang
jingglang

dalane kabeh wis pavingan
wis ora galengan

sing kari amung crita
lan polahe uwong anteng
kitiran

diuber wektu
nggolek kebutuhan

muga wae isih ana grapyak
lan semanake
sing padha liwat dalan kene.

#lest_sm /nov14

PINDHA EMPRIT

daksawang langit kebak
anggit

nalika peteng lelimengan
nyidhem panjerit

kasempyok mendhung klawu
ora kuwawa mbusek saka
jeroning dhadha

aku kudune ngerti
nganti seprene
mung pindha emprit
sing kepengin nggelar
endahe gurit
ing jembare langit

nanging suwiwi iki ora
kuwawa mabur dhuwur
senajan mung
pangentha kang sumlempit

rina wengi tansah
takcenthelakake
ing
mbranange karep

saben-saben
nggodha sukma

iba bungahe bisa
ngumbulna sedya
ing endahing mega.


#lest_sm /nov14

ATUR SAPALA

KEMBANG NEDHENGE
MEKAR

kumpulan geguritan iki dakwenehi irah-irahan
Kembang nedhenge Mekar,Saperangan sampun nate
kapacak ing majalah basa jawa Penyebar semangat lan Jaya Baya.

tema sing daktulis maneka warna saka rerasan batin lan
imajinasi sing ora kocap ing kasunyatan.

Atur panuwun marang bapa Djajoes Pete ingkang
sampun paring eguh pratikel,panyurung,ugi tansah sabar paring
panyaruwe ugi kekuwatan saengga kula saged nerbitake buku iki.

Ing pangangkah buku iki bisaa nambahi dokumentasi
ing sastra jawa,mligi dokumentasi pribadhi,ugi para maos kena kanggo panglipur ati.

mesthi wae gurit-gurit iki durung bisa apik lan lungit.
Saran ugi panyeda (kritik) lan panyaruwe tansah dakantu.

Nuwun

UKARA BIRU

isih ana segegem ukara

kang durung daktulis
ing lembaran biru

nalika ngukir crita sacoret
ing ngrembuyunge alang-
alang

kebacut nasak punjering
rasa

mretheli angen
nuwuhake tatu
tinatah jeroning dhadha.


#bda /okt/14
5 Oktober pukul 14:50 ·

GEGAMBARANING RASA

GEGAMBARANING RASA

Takwaca reroncene ukara
kanti getering ati

gegambaraning rasa
saka jangkah magita-gita
liwat ora kumecap
ing lirikaning mripat
mungguh bisa

mesthine taktakokne
werdine

iki dudų papan gelaran
nanging papan wingit
cumondhoking ati

kang nyecep jero
pesen sinandi

ora bisa dilaleake
tansah gumandhul ing
punjere tyas iki

nganti pungkasane aku bisa
ngerti.

#lest_sm /okt14

SUNGGING MAYA

saka tumiyubing samirana

takregem sakehing
panggrahita

aku kang ngendhem
pangrasa

saka wijiling sungging maya
mblabar ing pelataraning
nala
sumebar padhang semburat
ing antariksa

apa iki dayane kintaka?

kang ginawa angin
kumlawe ngeja saka tyasmu
amping-amping alelewa
ing pojoking netra

tansah sesondheran
dremejeg ing larikane idep
anjalari rasaku ngulandara

gawe ati kebak pitakonan
sapa sejatine panjenengan?

sungging mayamu
nuwuhake kayun
larap-larap angambar
amriik drejel sinukarta

reroncen ukara kang
ngeyomi
dhuhkitaning jiwa

#lest_sm /kump.gurit

YA GENE WEDI

saben aku liwat ing kene

saktenane ana rasa wedi
sing angel takkandhaake

kanthi mlipir-mlipir
jumangkah kesusu
kringet dleweran
ngempet semrawute pikiran
sing grapyak kena dietung
driji

lirikan mripat liwat slira-sliri
saben dina nyawang kanthi
kebak pitakonan

pancen ora takselaki
dina-dina tansah mburu
wektu

banjur kapan olehku sinau
lan ngerti

kamangka kembang kang
kajejer asri

tansah ngawe-awe tekaku
senajan amung kuwi-kuwi
wae sing taksalami

muga isih ana wektu
nandur bebarengan
nguri-uri sastra jawi tansaya
edi.


#bda /okt14
20 Oktober pukul 15:06 ·

TATU BIRU

angin ing pucuking pring

nggombyak ati nglangut..
rasa keduwung
tansaya nglayung

tangan kumlawe
nggambar lelayu

katrem ing kekesing ati
tanpa wates

esem kang ginawa angin
sinempyok mendhung klawu
lan nuwuhake tatu
rupa biru
njarem ing kalbu.


#lest_sm/27okt14

WAYAH SORE

ing ketiga ngerak

akeh tetanduran lan kewan
ngelak

sawah pindha ara-ara amba
tanpa sinaba

nalika mlaku-mlaku ing
bulak ngenthak

ngeterake angslupe
srengenge

pepenginanku gegojegan
marang angin sumilir
nyawang endahe langit biru
tanpa sesulak

pinaes mega dhampyak-
dhampyak

lan ing tengah bulak
bocah angon sesorak

ngundang barat gedhe
ngulur kenur
sinambi nembangake kidung
sore

ati bungah
dodogane mumbul

anteng
mbrengengeng sowangane
ohh..iki kang gawe atiku
katrem

ing ndesaku wayah sore
nyawang layangan
uber-uberan ing awang-awang

anjalari ati ayem lan tentrem

layangan anteng
mbrengengeng
tanpa pamprih
ngoyak kamemangan
ajar kaendahan
ing memitran?.


#lest_sm//28okt14

KESUNYIAN JIWA

dalam ruang hati
terangkai sepi

mencoba pasrah

meniti arah
dalam kesunyian jiwa
tanpa tepi

hanya sinar bulan
yang membias di kaca jendela
yang menemani diri

memantulkan cahaya
membasuh lara

malam semakin lelah
keluh kesah
semakin menikam jiwa

seorang diri
berteman sepi
berkasih sunyi.



#lest_sm/18okt14

KEMBANG PIKIR

tumetesing banyu luh
mili sauruting pipi

nalika atiku kasempyok sepi

taketung prenthuling banyu
kang mrintis ing kaca jendhela
nambahi kekesing ati

wis takcoba mbusek asmamu
saka kanyatan dina-dinaku
nanging tansaya amber banyu
kang kutah ing kalbu

tresna kang mbokicir
anjalari atiku tansah
klelep lan kentir

kebacut semi lan trubus
dadi kembange pikir

nanging yagene sliramu
tega ninggalake aku
tanpa ngerti
kapan bisa bali nyawiji.



#lest_sm/18sept14

TUGU BIRU

sing mapan ing pang garing
iku saugel rasaku
nalika tugel dening landhep
eri tanjang
sing nunjem kalbu
nalika biyen methik kembang
ing pinggir jurang
aku lan sliramu gegandhengan
nasak wengi
ngudhang endahe rembulan

aahh...saiki kari kenangan

senajan saiki wis kalungse
nanging ing kono
wis taktulis nganggo mangsi
saka deresing banyu luhku
kinemulan mega ireng
dadi tugu rupa biru
kang kebacut mbisu.





#lest_sm/16sept14

KANGGO ATIKU

dhuh ati..

aja kebacut ginulung luh

coba sawangen kae

rembulane ngawe-awe

nggawa warta anyar

nyebar esem kang kencar

mbukak lawang wela-wela megar

wis cup menenga

usapana luh kang demleweran

aja lara ati

yen wengi iki 

impen-impen sing edi

wis ora mranani ati

wis cup menenga..dhuh ati.

#lest_sm/17sept14

UDAN RIWIS-RIWIS

daktulis gurit iki
nalika wengi kang atis
mbarengi udan riwis-riwis

swara jangkrik
tansaya gawe tintrim
kaya wirama tanpa melodhi

atiku lan atimu
sesandhingan
cecaturan
bab apa wae ing kaca maya

pasuryanmu kebak panelangsa
netramu ana dhuhkita
yagene kudu teka
yen ta nipakake lara

pancen iki dudu tresna
kaya tresnane rama lan shinta

winungkus edi
ing telenging ati
ora ana sing mangerteni

dakgurit endah jenengmu
senajan saben-saben takusapi
kutahe luh ing pipi

pancen tresna iku ora mesthi
melu nduweni.



#lest_sm/16sept14

KAPANG

ngentha impen-impen
mung kandheg ing pengangen
kumlebat ngleyang
kaya kabuncang
tanpa wewayangan

ing pang-pang mega
taktitipake panandhang

isih ana rasa kapang
sing banget mbranang.

GURIT ESUK

ana geter kang mrambati ati
nalika nyawang mega-mega
memplak gerombolan
kaya putihe kapas
tumangsang ing pang-pang

wilangane ari terus lumaku
pengin takgambar maneh
endahe rasa ing walik mega

senajan wis anyeb
tanpa ana greget

saka punjering rasa
wis takcathet
ing larikane gurit
banjur taksimpen rapet
ngrenggani jroning batinku


#lest_sm/130714

TLETIK UDAN PUNGKASAN

tletik udan sing pungkasan
nyangking gorehing batin
tumangsang ing pang-pang
lan ron garing

saka pinggir cendhela
ati kang alum semendhe
sinambi nunggu mekare
kembang sore

banyu ngembes mili ana ing ati

aku isih nunggu wartamu
pitakonan datan ana pawangsulan

apa isih ana gurit
kang rinipta
ing selaning tletik udan

hawa atis
bedhidhing adhem njekut
tansaya ngekeb sukma

kanthi panyawang nglangut
ngawiyat ing semburate langit biru

ora ana kumlebatmu
ing pinggir kali
ngarep omahku
takkentirake selembar ron garing
tinulis jenengmu
mbokmenawa isih bisa takluru tapakmu.

#lest_sm/6714

GURIT CEKAk

aku mung bisa ngerteni

yagene...
angin ora banter
udan ora deres

wis bisa ngrubuhake
gedhene karep lan impen

gurit cekak reroncen
ukara tanpa magna

nganthi wengi gumanti
amung nyenyet sing taktemoni

sepi lan sepi
ngawiyat sundhul langit
tanpa kawates

apa tatu iki
bakal takgawa tumeka pati?




#lest_sm/juli14

MESEM

dikaya ngapa ora selawase
langit rupa biru

tansah takwulang ragaku
nalika gumlethak ana dhipan tuwa

mangertiya
urip iku akeh pacobane
ora selawase
 ayem kang tinemu
mesema...
senajan ati lara
senajan ati nelangsa

mesema....
senajan sepi
senajan sepa

dimen ngilangake lungkrahe
rasa pangrasa

tetep ndhedher pitaya
ing sewaliking susah
muga enggal ana bungah.

#lest_sm/juli14

MEGA KLAWU

gurit iki rinonce
nalika sore semendhe
ing pucuking flamboyant

semburate langit biru
malih klawu

angenku ngulandara
sadawane crita lawas
sing wis kalungse

ing antarane mega klawu
taklacak ucule tali tresnamu
nanging panggah ora ketemu

rinasa kaya nyabrang segara
kanthi prau tanpa layar
miyaki gedhene ombak prahara

hawa atis
tansaya nunjem ati

kembang flamboyant
luruh ana pangkon

guritan mega klawu
isih takcenthelake ing punering
inpen-impen

kang anjalari lairing tatu
tresna kabuncang
dening wektu.

#lest_sm/jul14

REMBULAN MOBLONG

nyawang jembare langit biru
nalika mapag tekane ratri
rembulane wiwit moblong
ucul saka rangkulane mega
manjila ing abyoring lintang
ngegla kawistara kagelar edi

pengin takgambar endahing
pengangen
jejer lintang sayuta
pating kerlip nyengsemke ati

binarung tetesing embun
mancati langit wengi
nyangking hawa atis
isih pengin takpulas abang
jembare angkasa
kanthi jejege sedyaku

sesuluh lintang manjer jroning
dhadha
takranggeh lintang mbaka siji
dimen padhang jangkahku
amematri ana jroning sanubari

wis dakcathet ilange tali ati
kesaput dening angin
ing lembaran batinku
dadi tuguning wektu
kang terus lumaku

rembulane moblong
yagene ora ceblok ing pangkon?

#lest_sm/juli14

MENDHUNG

mendhung kang peteng

ireng nggameng
kaya lumut-lumut ing watu item
nyengkerem ati tansaya surem

ngebaki pojoking ati
jejel riyel tan obah
marang karep tanpa wates
uga ora pantes

mendhung angendanu
anjalari jangka rerenggi

dhuh gusti
saka jero senthong
kang anyep nyenyet
kawula amung saget pasrah
dhumateng paduka

ngupadi pepadhang
ngedhang sumunare surya
ing sakdhuwure sajadah

‪#‎rerenggi‬ /melakukan suatu pekerjaan dng hati2

‪#‎lest_sm‬./jull14

TANPA ANA TAMBA

isih kaya wingi kahanan jroning ati
ngrakit gurit saka kacicire ukara
takjumputi siji mbaka siji
sing sakuntara rontog
mblasah saklumahe bantala
gogrog bareng tumlawunge rasa
kasempyok awu saka petenging wengi
aku kang kijenan
sumendhe ing gigiring mega

sinambi ngekep tatu

tanpa ana tamba
kanggo jampi usada
tanpa ana ukara
minangka kekuatane jiwa
tanpa ana lelagon
kanggo nglipur ati nelangsa
tanpa ana gendhing
kanggo pangeling-eling

saka kene takranggeh rasamu
rungokna swarane atiku
tansah angrerintih nyebut jenengmu

mbokmenawa sliramu ngerti
aku isih setya ngenteni
aja banget ngrerujit ati
elinga..nalika kaloron ngiket
talining ati.

KAPANG LAN SEPI

wengi kang atis
ing walike sepi
takronce gurit kapang
kang sauntara ngrembuyung
jroning dhadhaku

senajan amung ukara
tanpa makna
ringkih angrerintih
aksara iki bisa nrajang
sakehing pepalang
kapang kang mbranang
mulas pelataranig ati
ora bisa takselaki
wewayanganmu tansah ngreridu
gilir gumanti

ana sela-selaning mega
daktitipake lara atiku
daktulis ana dluwang biru
kanthi mangsi saka luhku
amerga kapang lan sepi iki
ora ana kang mangerteni

saben mapak ratri
ngenam impen tan ana tepi
panjenengan pinter banget
natah tatu
tanpa milah lan milih
kahanan lan wektu

banjur piye aku kandha
yen saktenane aku tresna

KAWRUH BASA

habib              #bangsawan arab
halep               #indah.cantik
haraka             #jamuan
harda               #nafsu
harja                #makmur
harjuna           #putih cemerlang
hasta               #tangan
hema               #emas
heni                  #pasir
herti                  #tegas
hima                 #awan
hita                   #guna
hur                    #unggul

ibnu               #anak
jabal.           #gunung
jalidra           #orang hina
jalma            #orang

TEMBANG KANGEN

wayah wengi
udan deres ora wis-wis
banyu kang tumetes
dadi saksi anggonku nangis

wong sing taktresnani
tega ninggalke aku
suwung jroning uripku
yen ora ana sliramu
sumilire angin
tansah ndudut kalbu
rasa kang takempet
agawe lara dhadhaku

lewat tembang kangen
muga bisa dadi tamba

tamba kangen iki
nandhang wuyung rina wengi

lewat tembang kangen
aku titip tresna

apa pancen sliramu wis ora
krasa
lewat tembang kangen
aku titip sayang
tresnaku mring sliramu
ora bisa ilang

apa lali apa pancen wis ora ngerti
saktenane aku mung sabar
setya ngenteni

ngenteni baline hitam manis
esemme
lewat tembang kangen iki
wujud katresnanku.

NUTRISI HaTI

dalam kehidupan sehari hari kita sering
menilai sesuatu dari bentuk luar nya saja.
seperti ketika ada yang berbaik hati memberi
kita sesuatu.maka secara otomatis kita
menganggap orang tsb baik.
namun di lain waktu ketika kita
membantu seseorang dan hanya
mendapat ucapan terimakasih
maka kita akan memberi nilai buruk
terhadap apa yang kita terima.

sesungguhnya penilaian kita
bukanlah kebenaran
baik dan buruk hanya berdasarkan
prasangka .

karena hanya karena di beri sesuatu
perasaan kita jadi baik
dan hanya di beri ucapan terimakasih
maka berubah buruk.


maka semua kembali pada hati
nurani.
ihklas dan rendah hati
yang akan menjaga kita dari
prasangka yang merugikan.

kebanyakan dari kita tidak
menyadari bahwa masalah
yang timbul dalam hidup kita
karena selalu mengharapkan
orang lain mengerti dan
memperlakukan kita seperti yang
kita anggap pantas.

ING LURUNG SEPI

nalika sikil wiwit jumangkah
ing sadawaning lurung sepi iki
kanthi pangajab bisaa sambang
marang rasa kapang

isih taksimpen ana pojok netra
esem ngujiwatmu

uga liring netramu
kang andum sih kebak rasa tresna
nalika gegandhengan
nyawang lintang rembulan
rerangkulan

kangmas...saiki amung kari crita
karingkus mangsa
manis lan endahe janji
kepunggel dening garising pesthi

kangmas..umpama sliramu
krasa lan mangerteni
ana luh kang kutah
nalika aku ijen ngurut dalan iki
mbokmenawa isih bisa
takjumputi wewayanganmu

senajan tanpa sunaring
lintang lan rembulan
kang wis sauntara uga ilang

ana ing wates kapang iki
amung ana tumetese waspa
kalindih ing sepi

angrerintih perih.

Racikan Jamu Rheumatik Ala Bunda Sahsa

Bahannya :

- Minyak Gandapura 225 cc

- 3 butir Bawang Putih

- 3 butir Pala
- 10 buah Cengkeh
- 15-20 butir Merica hitam
- 1/2 sdt Jinten hitam
- 2 jari Jahe

Cara membuatnya :


Semua bahan kecuali Gandapura disatukan dan ditumbuk hingga halus. Hasil tumbukan yang telah benar-benar halus dimasukkan ke dalam wadah yang ada minyak Gandapuranya. Aduk hingga rata dan setiap malam dibalurkan dan digosok ke seluruh tubuh. Bila sakitnya cukup berat dapat dilakukan pula pada pagi dan siang harinya.

Gondopuro

MASKER ANTI KERUT

bahan: 

* 1 bh wortel ukuran besar

* 1 sdm minyak zaitun atau minyak almond.

Parut wortel sampai halus (gunakan parutan dari food processor). Setelah siap taruh dalam wadah. Masukkan minyak zaitun atau minyak almond ke wadah tersebut, dan aduk sampai menyatu. Simpan dalam kulkas, dinginkan ramuan selama 1-2 jam. Olekskan dengan lembut ramuan tersebut di sekitar mata. Berbaringlah dengan mata tertutup dan rileks. Bersihkan wajah dengan air hangat.

Racikan Jamu jerawat yang diminum

Untuk berusaha mengobati kulit muka yang berjerawat, selain dengan cara penyegaran dan dengan cara memakai bedak obat jerawat, masih ada usaha lain yaitu dengan membuat ramuan yang diminum. Adapun resepnya adalah:

Temulawak kira-kira : 2 kali ibu jari
Kencur kira-kira       : 2 kali ibu jari
Asam                        : 1 tangkai
Jinten                         : ½ sendok teh
Gula aren                   : secukupnya.
Cara membuatnya: bahan 1 dan 2 dikupas kulitnya dicuci bersih, bahan 3 dan 4, 5 dicampur dengan bahan 1, terus direbus dengan ½ gelas (375 cc) dan tinggalkan 1 gelas (250 cc), ramuan tsb kalau sudah hangat suam-suam kuku terus diminum.

Racikan Bedak Jerawat

Bahan:

2 ruas temu giring
2 ruas kunyit
1 butir jebuk sari
1 buah kulit jeruk purut
Khasiat:
Temugiring dalam ramuan ini berguna untuk menghaluskan kulit, sedangkan kunyit kerap dipakai sebagai bahan kosmetik. Jebuk sari berkhasiat antikuman, dan kulit jeruk untuk membersihkan kulit.
Cara Membuat:
Kupas semua bahan dan cuci bersih. Lalu tumbuk semua bahan hingga halus. Pulung tanaman tsb, menjadi beberapa butir dan jemur hingga kering betul. Setelah itu, ambil 1 butir bedak jerawat, beri sedikit air dan usapkan ke wajah. Biarkan beberapa waktu, setelah kering, cuci wajah anda dengan air hangat.

Ma'na Cinta

terkadang kita merasakan badan kurang fit dan sakit seluruh sendi2 tubuh
agar kita bisa menghargai betapa berartinya kondisi tubuh.selagi sehat

begitupun dng cinta terkadang
ada rsa kecewa dan sakit hati
agar kita tahu seberapa besar magna cinta sejati

#lest_sm

GURIT IBU PERTIWI

sunaring sang pradanggapati
tansaya angslup
ceceketan hancala
ing sisih pracima
bebarengan sunar candkik ala
kang manda-manda jingga
surup wis wanci ngegla
sinareng lembut pawana ngidid

saka ati sepi
lamat-lamat karengu
swaraning tembang edi

kidung ibu pertiwi
kang ngelus ngerih ati

ibu pertiwi
paring boga lan sandhang
kang murakabi
peparing rejeki
manungsa kang bekti
ibu pertiwi
ibu pertiwi
sih sutrisna mring sesami

ibu pertiwi
kang adil luhuring budi

ayo sungkem mring ibu pertiwi

kidung kang bisa nuwuhake greget
pinangka pisungsung pamuji

nanging ati iki miris
yen andulu ibu pertiwi nandhang dhuhkita
bumi iki lagi lara ati

nyawang polah manungsa
lelumban nuruti ardaning dhiri

adol lamis

ING PUCUK SORE

Ing walik cakrawala
Nalika mega-mega nggirng angslupe bagaskara

dakrone angen-angen
ing walik cakrawala
Nalika mega-mega nggiring angslupe bagaskara

ngenut sumiliring angin
nalika aksara amung kandheg ana larikaning gurit 
tanpa swara

ing pucuk sore
pengin takudal sakehing crita
saka ati kang semplah
kareben bisa ambyar 
kutah ing pelataran.ati

aku wis sumeleh 
ngenggar-enggar pangrasa
saka kanyatan 
kang ora takngerteni

atiku tansaya rengu
sinambi nyawang langit werna klawu

ya ben wae
ati iki sepi

ya ben wae 
ati iki garing

ya ben wae
ati iki nglinthing

sepi lan sepi
kalindhes katreming wengi.

#lest_sm.jun14

PRING ORI PINGGIR KALI

11 Oktober 2013 pukul 10:36

semilir angin ketiga ngelus ros-rosaning suksma

hawa panas ndepani bantala

nanging ora ateges jroning dhadha nyimpen wawa

amerga tansah cinawis segere banyu tawa

sing taktawu saka bening banyu kali

kang mili gemricik sakuruting rina lan wengi

ing papan kene akeh pangimpen edi

rinonce arum pindha kembang melathi

biyen ora kendhat gawe tentremíng ati

nalìka bapak ìbu uga sì adi

tansah kekidungan gitaning atí

omah ceklì pinggir kali

saben napaki ari takulati

sakehing gambar kang tumantul peni

kanggo nglelipur manah kang sawetara sayah

saka landheping margi panguripan

senajan wis taklempit-lempit jroning ati

padhatan isih pecah

ambyar nganti sumebyar

anjalari pedhut peteng

angendhanu sadawane selendhang ungu

lumantar prau godhong pring iki

dakkèntèrake panggresahe ati

nalika lungguh ana ngisor pring ori

dakselehake sayahing ati

kabeh lelakon urip iku pepesthi saka gusti

kang kudu takprangguli

ora bisa takselaki

aku ngerti gusti ALLAH ora keliru andum pesthi

marang sedaya titah íng saklumahe bumi

srengenge wis angslup ana gisiking mega

dakpungkasi ibere angen-angen tanpa wangen

ing pèreng tyas rinasa adhem

pancen urip kudu ngugemi kodrating gusti

muga-muga enggal purna pangastuti

kaya candhikala prapta

enggar-enggar ngudhari rasa

pisungsung tataning nala

nyuwun pepadhang nur gusti kang maha suci.

Catatan : nalika sepi lungguh ngisor prìng pinggir kali,. okt/13k 

GRIMIS ESUK ING SASI DESEMBER

31 Desember 2013 pukul 10:12

Taktulis larik-larik aksara

ing saklumahe pedhut esuk

nalika samirana mrambat ngelus pelataran ati

kuwawa ngirim suwara samun mlintir pangrasa

grimis ngriwis miyak sepine ati

marang mendung taktitipke sagegem aksara dhuhkitaning nala

grimis esuk iki kaya ngekep eseme bagaskara

tumempuh Semilir angin ngosak-asik pelataran jiwa

kala-kala ngrontogake kudhup melathi

sing wingi bengi dadi panglipuring ati

jroning rasa wis kebacut teles

saka eluh kang kutah

tumpang suh ing deresing banyu udan

aku mung bisa meneng

njegreg tidhem..

Nglaras tumiyubing angin nunjem dhadha

sinambi ngekep rasa panelangsa

tanpa umpama

amung jroning gurit iki

daktulis suwaraning ati

lerem jroning warangkaning gatra lan ukara

dakajab ngiring jangkahku mecaki dina-dina ing ngarep

jebule abot lelakon urip kang lagi takprangguli

rasa sumendhal ing pereng napas

nginggati anggit kang siningit..

dhuh Bapak ..ibu

Marang riwis udan dakudal kapang kang suwe kapendhem

mendung ing pucuk desember

nggambar perih tinatah abang njarem ing kalbu

bebasan mung kadya rembulan sing nglari playune lintang

daksawang ing tawang amung peteng sinawuran tetesing grimis ngriwis

ing selane udan tanpa leren daksebut asmamu

Dhuh bapak .. Ibu ..

kaya-kaya wis garing waspak iki.

Marang lengkung kluwung nggurit panjeriting ati

mugi gusti paring margi jembar lan padhang

mapan ing swarganing gusti

dakkirim payung gambar kembang melati

lebur ing gurite gusti kang maha siji lan suci.

NALIKA REMBULAN LUNGGUH ING PUCUK PAPRINGAN

7 Maret 2013 pukul 8:06

Sedih cumondok ana galih 

getere kalbu nggubel laku 
rasa rengu angendanu 
ngrerujit jroning pangrasaku 

pangangen nglangut 
tumangsang ing srengenge kang angslup 

manuk podhang seliweran 
cemolotan ing wit-witan 

candikala nggawa panelangsa 

wengi wis tumeka 
nyangking endahe cakrawala 

katon melik-melik abyore lintang 
pating kerlip ngayahi gati 

urube konang uber-uberan 
nambahi rasa ati ora karuan 
wengi iki kaya ora padhatan 

aku wedi.. 

ngadhepi wengi kang kijenan 
ngenam sayuta pangimpen 

rembulan lungguh ing pucuk papringan 

cahyane montang-manting 
ing tumiyube angin 

ing kana pengangenku nglambrang 

nglaras kidunge ati 
angayut gitaning ratri 

sepi mamring.. 

sepi sepa maesi nala 
satemah angrerujit pangrasa 
pindha bantala rengka 

nganti-anti tumetesing embun 
kuwawa nelesi sesambate ati 

wengi tansaya wingit 
sesingidan ing suksma kang ngulandara 

ing sprene isih nyidham tumurune tletik banyu udan 

ah...ing wengi iki 
mung bisa lelumban ing beninge banyu netra 

jangkahku tansaya lungkrah 

anggonku lumaku ora mantep 
sakujur anggaku wis sayah 

ana endi sejatining ilmu kang bisa dadi panuntune ati 

tumuju mulyaning bebrayan 
kang kebak pengareb-areb 

tan kendhat anggonku memuji 

manembah satuhu ing ngarsane gusti kang maha suci 

mugi gusti tansah amberkahi 
ing siyang lan ratri...amin 

.maret13@LSM