ING GARIS PAUGERAN

Dakaras esem ngujiwatmu
lumantar pecahaning
sorot rembulan
ing selaning gegodhongan
gilar-gilar madhangi nala
ing pang-pang mega
cumenthel warta wigati saka
atimu
daktampa kanthi kebak rasa
lan gemrisike gegrumbulan
mbisikake panandhange jiwa

takkekep perih kang nunjem ati
senajan dalan iki
rumpil lan kebak eri
kita kudu tetep lumaku
lan tansah bisa nyipati
Gambar-gambar dlamakan
ngisor-ngisoring
Garis paugeran

Kembang arum dalu
ngelingake prasetyamu
kang wis ginulung wektu
kalungse lan klawu.

19 November 2014