5.WASITA ADI @BUNDA SAHSA

1.Panase kok kaya ngene
Ya wis katon bentere suryane
Sarinane sawengine
Mung ngrasake panase kaya ngene
Larang udan larang pangan
Sabendina mung tansah keloyongan
*lirik lagu larang udan

2.Ketenangan batin iku
Mungguh diaji.
Jian larang tenan regane
Pikiran anteng kitiran
Ati judheg ora karuan
Isine mung uring-uringan
Ora jenjem tansah klisikan
Apa sebabe?
Merga atine durung semeleh
Durung bisa nrima kahanan
Pungkase ragane bisa rusak
Merga jiwane kemrungsung

3.Yen gelem sinau
marang pralampitaning pari
Tansaya mentes isine
Kepara meneb lan ndhingklug
Ora dangak kaya pari kopong
Iku mertandhani
Bisa nerapake Laku kang utama
Apa wae kang ditindakake
Bakal antuk kaprabawan Gusti
Urip kang manfaati mring sesami

4.Sing dadi underaning prakara
Yagene asring duwene ati gela
Satemene tuwuh saka atine dhewe
Atine gampang pokak
mung merga omongan sepele
Njur tersinggung lan dadi satru
Yen iku dadi pakulinan
Kabeh bakal wegah srawung lho
Wedi kena sawabe
katut di arani tukang gegeran,..heee

5.Sing njalari sastra jawa
elok kepara gawe sengsem
Iku merga saka wosing gati
Kang jumbuh karo kahanan
Akehing tema sing katulis nyata
Lan separone ngenani pasemon /simbolik
Sing ora saben pawongan bisa
Lumrahe penulis saka profesi guru
Utawa wong biyasa sing nresnani sastra

6.Rodha panguripan iku muter
Tansaya dina saya banter
Kudu duweni gegondhelan
Kang teguh marang kapitayn
Dimen slamet teguh rahayu
Aja mung anut grubyug
Sing ora jelas tujuwane
Suk-sukan ....
Dhesek - dhesekan
Jer pungkase urip
Kabeh nut garising pesthi
Mbok sing sareh atine

7.Jangkah magita-gita
Nguber playune wektu
Bola bali pandom jam
Dadi alasan obahing laku
Awan dadi wengi
Esuk dadi sore
Muser jer kesasar
Tekan jagad pangumbaran
Sambate ngaruara
Nglarung ambisi ing endi?
Nyatane kekarepan
miber tan bisa nglari
Ngleggana ing madya ratri

8.Jare sapa ing ndesa
Ora ana apa apa
Wayah iki lagi nedhenge brahi
Pager racak lan penghijaun asri
Umbul umbul rontek kemayu
Kumlebat ing langit ndesaku
Lampu penjor kelap kelip
Nambahi ayu wanci dalu
Ora ana beda karo kutha
Warga gumbira nom tuwa
Kabeh sayuk ing dina merdika

9.Senajan mung kijenan
Ing tlatah awang awang kene
Aku ora sumelang
Nglewati pirang pirang pepalang
Saka panasing kahanan
Dhewe emple ngenam ukara
Kang dakjejer ing larikane gurit
nut kumlisiking ati tanpa leren
BISMILLAH wae
isih ana kekendelan 
Saking Gusti kang maha wikan

10.Seneng iku mapane ana ati
Sapa wae ora dikeparengake meri
Merga pengerten maknani kabahagiaan
Antara kula lan panjenengan mesthi beda
Yen kula sqged tangi turu njrantal
Ora nganggo ngelu utawa linu
Senengku wis ora kaprah
Anak lan bojo sehat rejeki cukup
Alhamdulillah💕💕👍

Bunda Lestari Sahsa Malika
100918

4.WASITA ADI @BUNDA SAHSA

1.Mecaki lurung wektu
Mangsa katiga ngerak
Anane mung panas ngalad-alad
Urubing dahana mapan ing dhadha
Tansaya mbulat-bulat
Ngegla ing netra lan lathi
Ngobong alusing budi pakerti
Lali marang luhuring jati dhiri
GUSTI
Nyuwun tetesing sih paduka
Marang Manah ingkang *umub
#Bules

2.Basa jawa pancen duweni kosa kata
Ingkang kathah mulane basa jawa iku sugih 
Dening maknane mung siji ning arane seje
Contone >> lungguh
Njungok
Pinarak
Ndhoprok
Thenguk thenguk
Theruk theruk
Ndhodhok
Setimpoh
Ndhoglog
Sila
Jegrang
Nglesot
Nglempoh
........
.......lsp

3.Urip kanthi prasaja
Mesthi bakale nemahi ayem
Pengasilan lan pengeluaran
Sabisane kudu diatur
Dimen ora kabotan
kebutuhan lan pepenginan
Kudu pinter pinter metung
Ora kabeh karep dituruti
Eling dinane isih dawa
Aja nganti keduwung tembe mburine...

4.Kabeh titah duweni lelakon urip
Kedadeyan sing gawe pinggete ati
Pancen suwe ilange saka pikiran
Ya ing kene iki .....
Bisa sinau mujudake kadewasan dhiri
Kanthi wicaksana bisa nyikapi
Lan gedhene bisa instropeksi

5.Meksa ati kudu bisa narima
Marang kanca sing rese
Iku bisa nuwuhake perang batin
Lan anjalari sesaking dhadha
Ning.....
Kudu eling yen nggugu rasa
Pangigit-igit ing jroning ati
Satemene  bisa ngobong kabecikan
Sing sasuwene iki wis ana.......

6.Munggah mudhune pikiran
Bisa ngedhemake ati panas
Ora ana wong sedhih sateruse
Yen ora dikawiti saka saiki
Mesthine atine dhewe sing bakal rusak
Ora ana masalah sing ora ana solusine
Atine wae sing jembar nampa saran
Saka kanca utawa kulawarga

7.esem kang tulus saka ati
Iku pindhane suluh ing pepeteng
Bisa gawe bawerane kahanan
Mring ati kang gemuleng sedhih
Mula becik yen tansah asring ngemong pangrasa
Aja kebacut ing lara ati

8.sapa wae mesthi seneng duweni kanca
Kang tansah sumeh lan semanak
Ing cedhak dhewekne krasa nyenengake
Samubarang katon gumbira
Ora ana awu-awu lan pamrih
Mula ing samangke angel banget
Bisa methukake kanca sing mengkono
Anane mung golek untunge awakke dhewe
Lan asring diarani wong egois

9.ati iku papane sakabehaning rasa
Seneng lan sedhih bisa sawayah teka
Becike samubarang sing samadya
Dimen bisa nyikapi kekarone kanthi cerdhas
Ora klimpungan angrerintih nalika sedhih
ora kebacut bungah yen kasinungan anugerah
Eling lan waspada iku kang utama

10. Ora ana wong seneng ing kekurangan
Lumrahe kabeh mbudidaya
amrih uwal saka kacingkrangan
Dene asile pancen wis diatur Gusti ALLAH
Ora usah akeh ngersula
Usaha lan donga wae sing diakehne
Dimen atine adhem ayem tanpa panggresah
Gusti maha murah

Bunda Lestari Sahsa Malika
100918

3. WASITA ADI @BUNDA SAHSA

1.Seneng lan ora seneng
Iku urusane ati
Ora kena dipeksa
Apa maneh direkayasa
Ya wis ben....
Apik menurut panjenengan
Durung mesthi cocok kanggo liyan
Bisaa ngendhalikake obahe lathi
Aja sokglogok....njur alok
Bisa ndadekake congkrah

2.Apa sing daktulis
Ing tritis awan lan dalu
Pancen dudu wewadi
Ning amung rupa kembang pikir
Dakpaes ing dinding kaca
Sapa wae bisa maca
Ing pangajab bisaa nuwuhake rena
Marang endahing basa jawa
Kang tharik-tharik dakjejer
Ngunggar semangat angupaya
Ngrembakaning sastra jawa

3.Reroncen kembang pikir
Mbaka siji daktlateni
Mring jembaring tawang
Lilanana aku methik mega kae
Dhampyak-dhampyak ing langit biru
Rupa putih resik karengga
Nalika mapak tekane sandikala
Nyengsemke jroning jiwa
Aku katrem ing lelewamu
Panyawang netra
tumuju ing agsluping surya

4.Satemene dudu angslupe surya
Sing njalari aku katrem ing kene
Uga dudu gemulunge ombak segara
Ning  bening sorot netramu
Kang banget ngeman marang aku
Uga edhuming parengkuhmu
Nalika aku butuh sumendhe
Saka lungkrah lan sayah
Astamu kang kebak tresna
Isih dakrasa sore iki?

5.Pucuk palem ing pinggir cendhela
Kumlawe ngipasake lelamunan
Angin sesondheran anjalari atis
Nyangking ibering kenangan
Kang suwe wis daklali
Sorene tidhem nglangut
Tatu lawas angrujit nala
Ya gene tekamu ora kandha?
Ing kene Aku ngrumpaka
Mring lereming jiwa

6.Esuk kang sumunar
Bagaskara anelah atis
Netepi janji nyebar cahyane
Ing tlatah basundara
Pedhut katon geglayutan
Tumangsang ing pucuk randhu
Anyaruwe lakune wektu
Binarung angin sumilir
Kahanan ndesaku tentrem
Among tani lan sanak kadang
Tansah adhem ayem
Maturnuwun Gusti...

7.Bun esuk ambyar
Ing cahya kang bingar
Gumilaring anjalari amrik
Ing pandulu netra
Estu gawe reseping jiwa
Dakulati kanthi bungah
Senajan ketiga durung purna
Rinasa nggandhang mangsa
Sawah pategalan lungkrah
Aja susah.....
Isih ana tirta paleraman
Saka ati kang kebak syukur

8.Wis dudu rahasia maneh
Tanpa tedheng aling aling
Ing endi papan
Ing endi wayah
Keprungu umeg regejegan
Rerembug saru
Adu argumentasi
Datan ana pungkase
Horeg padha sesumbar
njalari girising ati

GUSTI NYUWUN PENGAYOMAN
saking sedaya panase kahanan
*bules,120818

9.Mripat pating plirik
Ngupadi sisik melik
Ora preduli bledhug
Nempes pandulu 
Ora dadi pepalang
adreng ngoyak tujuwan
Rasa pangrasa atos
Apa malih rupa watu???
*bules,120818

10.Snau basa jawa kang asring
Digunaake ing larikane gurit :

Kayun     >> karep
Paeka     >> pikiran ala /akal jahat
Tyas        >>   ati
Dhuhkita      >>sedih ,susah
Pramudhita >> bungah ,beja
Delanggung >> dalan
Aldhaka   >> gunung
Samirana >> angin
Kemba >bosen,jeleh

Bunda Lestari Sahsa Malika
100918

2. WASITA ADI @BUNDA SAHSA

1.Urip iku sarwa nyawang
Ana sing peteng uga padhang
Kabeh wis dadi panandhang

Muga bisa amecaki dalan dawa
Kanthi wening lan wicaksana
Senajan ta....
enggokan lan rumpil tansah ana
Tetep madhep mantep tanpa tida-tida👍💕

2.Nyoba milah kanthi wening
Apa ta sing dadi punjering
Reruwet kang mapan ing batin
Supaya laku bisa anteng
Saorane endha saka sesandhungan
Kang ngadhang sadalan-dalan
Jroning ngupadi kabagyan.

3.Reracik kopi wanci awan
Angambar ginawa angin
Saka omah cilik pinggir dalan
Kopi ireng Nuwuhake inspirasi
Urip pancen kaya aruming kopi
Nyenengake lan gawe marem
Marang sapa wae sing seneng
Bener kandhamu
Ngudheg kopi sendhoke mung siji
yen wis janji aja nganti besuke lali.

4.Oh....ya wis ngerti saiki
Khawatir kliru je
Yen wis jelas ngene kan
Sawayah-wayah ora wedi salah
Jian....
Dadi wong cubluk kaya aku iki
Samubarang kudu ati-ati
Kareben ora nuwuhake masalah
Merga salah omongan.

5.Suluh satlenik ing ati alit
Ing kalane mendrip-mendrip
Keterak semiliring samirana
Dakramut kanthi sagegem kapitayan
Amrih sumunar ing obahe jaman
Kandhamu
Ilining kemajuan
Akeh sing wis kelangan
Edining pakerti kang peni
Marang krenteg batin iki
Dakpuji sastra jawi lestari

6.Duweni ati sing sabar
Tansah sumarah lan narima
Iku ya ora gampang
Ning yen tansah nglatih dhiri
Samubarang disikapi kanthi positif
Mesthine bisa ngendhih pikiran negatif
Urip krasa entheng tanpa sanggan
Bahagia lair batin bakal karengkuh
*aamiin

7.Undhakane pakerti positif
Iku nglewati proses
Ora segampang omongan
Kayadene nggayuh kanugrahan
Iya mbutuhake tirakat lan laku
Dimen bisa meper dhiri
Bisa nggrayangi kekurangane
Sing sasuwene iki katutupan ego
ing kono bakal tinarbuka batinne
Lan Ngrumangsani mung titah lumrah

8.Pucuk pring montang-manting
Kumlawe ngawe-awe tyas iki
Nelungake rasa kapang
Marang kenangan 
Sing sasuwene iki daktali
Ing ros-rosaning batin

Embuh
kapan bisa tumiyung??
Dakanti ing pereng wektu
Senajan ta rekma
Iki wis malih rupa
ati iki isih nandhang rasa
*bules,090818

9.Urip iku bisaa mardika lair batin
Tata lair >
bisa nyukupi kebutuhan urip
Kanthi atusing kringet
lan ora dadi sangganing liyan

Dene kamardikan batin>
ngupaya nyingkiri hawa nepsu
adoh saka asor nistane pambudi
Sepi ing rasa melik lan dengki
uga tuhu marang Gusti Pangeran

10. Maturnuwun atas apresiasi
Saking panjenengan
Ingkang remen seratan kula
Mligi Ngangge basa jawi
menika saged dados pamecut
Anggen kula nyuntak rerasan batin
Arupi puisi, gurit lan sangu leladi
Mugi driji lan manah kula *sinkron
Remen Ngripta gurit ingkang lungit
nuwun💕👍

Bunda Lestari Sahsa Malika
100918

1.WASITA ADI @BUNDA SAHSA

1.Urip iku peparing adi
Jlentrehe...
Ing alam bebrayan iki
Samubarang bisa lumaku kanthi becik
Amerga ana tatanan lan paugeran
Kang dadi pedhoman ngaurip.
Ora usah kepengin nyoba
Dadi kaya wong liya
Kudune tansah nggondheli
Marang kapribadene dhewe
Ora ana manungsa sing sampurna
Kabeh duweni kaluwihan uga kekurangan
Sing mengkone bakal saling *melengkapi
Antarane siji lan liyane.

2.Wujud kaberkahan lan kanugrahan
Saka GUSTI pangeran
Iku bisa arupa kesarasan awak
Lan kelancaran pakaryan
Senajan peningkatan ekonomi
Durung bisa nyenengake
Sing penting cukup kanggo urip sapadinan
Lan tetep nggedheake  rasa syukur...

3.Sabar iku mapane ana ati
Sing iklas ....
Bisa ngadhepi samubarang
Kanthi kaweningan batin
Ora kebrongot ing kanepson
Sing pungkase bisa keduwung

4.Padha bukak usaha dodolan
Padha barang sing diadhepi
Yagene rejekine beda?
Ora usah gumun
Kabeh wis ditata GUSTI
Senajan mung sethithik
Yen disyukuri..
Yen diutuni ....
Mesthi mbarokahi..
Aamiin

5.Tekade wae sing kudu dikencengi
Senajan usahane sasuwene iki
Isih durung ana tandha-tandha nyenengake
Tetep iklas anggone makarya...
Lan ngudi murih ana dalan
Kanggo mbukak lancare kanugrahan
Kanthi khusuk ing panembah
Aja pethal jroning ngibadah

6.Wong atine serik lan srei
Iku kaya-kaya angel mari
Kapan wae ya panggah usil
Seneng nglarani atine kanca
Sing dianggep dadi  saingane dhewekne

7.Wong seneng maido liyan
Iku prasaku wong kurang penggaweyan
Ya wis ben ta pancen kemampuane sakmono
Anggite ya pengin kados panjenengan
Sing hebat samubarang mumpuni...

8.Dadi wong pinter iku piye ya rasane?
Omong sak omong kok kaya entheng banget...
Nyalahke kae
Maido kene
Nyatur kono
Ngritik iki iku...
Kabeh kok ora cocok
Sembarang kok salah
Lha.,,,mbok panjenengan wae sjng ngrantasi
Jal...beres apa ora?
*alahem

9.Ana unen-unen
Wong ngalah iku
dhuwur wekasane
Ujar sakecap
Laku satindak
Tansah ati-ati
Nengenake karukunan
Guyub tanpa congkrah
Ya wis ben.....
Diarani lugu lan bodho
Ning ora nate gendra
Njaga toleransi
Jroning urip ing bebrayan agung

10. Yen dinane iki
Ati rumangsa bungah
Mbokmenawa...
Ing tebih kana
Ana donga saka ati
Kang tansah caket
Mring donga pamuji
Lan Gusti kersa ngijabahi

Bunda Lestari Sahsa Malika
100918

AKAN BERUBAH

Orang-orang dan tempat di sekitar kita akan berubah, 
Seiring berputarnya sang waktu
tetapi kenangan tentang apapun yang pernah ada 
Akan selalu sama. ..
Dan kelak semoga kita  
menjadi orang yang pantas dikenang 
Karena Perihal kebaikan kita mungkin??
Aamiin yaa robb💕💕

Bunda Lestari Sahsa Malika
100918

KETABAHAN HATI

Dear..hati
Ketika keresahan jiwa datang menghampiri
Dan engkau terlihat begitu damai memaknai
Begitu sabar dalam hal mengupayakan reda
Maka ketabahanmu yang engkau redam di dada
Sungguh sebuah bentuk ketegaran yang luar biasa
Tetap semangat...wahai hati yang tangguh

Bunda Lestari Sahsa Malika
100918