MENDHUNG ING CENDHELA

MENDHUNG ING CENDHELA
.
samar katon ing pandulu
langitku kelabur pedhut klawu
esuk iki praupan dadi njenggureng
ora katon sumringah
ngaasi wong-wong pating sliri
mlaku ing sadhuwure bun
kinemulan hawa atis
kaya ana sing digoleki
delengen....
sikil-sikil jumangkah tanpa sayah
napas krenggosan anuju pategalan
apa ta sing digoleki?
datan duweni wektu kanggo sangga wang ...
ngumbar angen
nggambar impen ing sadawane laku
ing kalane kebak reridhu
sesandhungan watu
saka kaca jendhela iki
daksawang selembar godhong gogrok...
kumleyang...
kabuncang...
ing mendhung peteng
nalika mungkasi sasi oktober tahun iki
nanging isih ana siji kembang
nambahi amrik ing panyawang
kang isih.setya kanthil ing gagang
kanthi esem sing siniram cahya
saka ati sing kebak welas asih.
.
**lest sm,okt16

ELING LAN WASPADA

ELING LAN WASPADA
.
Wis takngerteni pirang-pirang wadi
kemlebat ing kedhep netra
wis takwaca reroncene ukara
sing asring koksuntak ing nawala
nalika katut semiliring samirana
kumleyang ceblok ing tritis wektu
kang saben-saben nggawa warta saka paran
ngenani suwara kang angrerintih
sambate weteng kang ngelih
uga pambengoke kenya sing kelangan slendhang ing awan drandhang
kemlisiking laron sangisore lampu taman
uga grenenge kembang lan kumbang
nedhenge andum katresnan
ing endahe tegal kasmaran
ngalela tanpa sungkan
.
aku dadi weruh
luh kang sesidheman ing walik esem mu
kejungkel tiba ing jurang kasangsaran
sambat nandhang tatu kelaran
kabeh wis tak tampa kanthi cetha
.
ora ana tedheng aling-aling
ora ana sekat ing antarane wadi
ngenani obahe lathi lan ajining dhiri
.
tuwa lan mudha
priya lan wanita
kagubet ing ilining jaman
internet wis dadi tujuwan
esuk awan nganti bengi wis ora kelingan
kentir sing jeneng internetan
ngesok uneg-uneg tanpa petungan
driji lan pikiran pindha panah
kang bisa mencelat sawayah-wayah
tumancep tanpa alangan
ing kalane bisa gawe bungah
uga bisa njalari ati susah
.
siji sing dadi paugeman
aja nganti lali ing jati dhiri
tansah semendhe marang Gusti
eling lan waspada.
.
**lest sm,201016

IBU

IBU
.
saben mlebu metune napas
tansah rinoncen donga
wilanganig pangucap
kebak rasa welas asih
solahbawa tan ginawe
prasaja satemah gawe rena
tumrap sapa wae
mligi garwa lan para putra
.
menika kang aran ibu
jiwa cumadhong mring panadhang
kebak rasa panarima
teteg teguhing rasa
anjalari tentrem kulawarga
sabda kawedhar winungkus donga
ibu....
ing asta panjenengan
rinipta santosaning jiwa raga
tangguh ngadhep kahanan donya.
.
ibu....
sembah sungkem para putra
tansah katur ing pangkon panjengan
nyuwun lumebering samudra pangaksama
nganti seprene dereng saged damel rena
kepara damel cuwa lan nelangsa
ibu..panjenengan wanita mulya
widodarine garwa lan para putra.




**lest sm,220916

PITUTUR BECIK

Sing jenenge piwulang aji/pitutur becik il
Iku bisa saka sapa wae.
contone saiki akeh mutiara kata utawa kata bijak
sing gampang diwaca ing sosmed.
sing akeh-akehe ngajak marang kita
Sami duweni kaprigelan
Nintingi prilaku salebeting gesang ing alam bebrayan.
urip pranyata ora mung saderma mburu drajad lan bandha
minagka prasaratane ngaurip
nanging ati lan rasa
Uga diupayaake mekar
Amrih bisa dadi tetimbagane
Anggone jumangkah kanggo kabagyan lair batin.
.
lelakoning manungsa pancen owah gingsir
Lan akeh kedadeyan sing kadhang ora dinuga.
wingi bungah saiki ora kanyana bisa susah.
.
kaendahan alam kang ginelar ing sakiwa tengen kita
Bisa dadi colok madhangi ati
Kang nembe ruwet.
sorote srengenge esuk
kedhepe kartika
Kemriciking banyu bening mili
sarta arum kembang lan ijo gegodhongan
yen kita gelem ngematake bisa ngresepake ati lan mbenigake pikiran.
saengga nuwuhake wirama bungah sing angel digambarake.
nuwuhake greged anyar
sawise awak sayah pikiran lungkrah
Ngadhepi rutinitas penggaweyan sing banget meres uteg.
.
urip ing jaman saiki kanthi maneka masalah
Kkudu pinter-pinter nata ati
amrih pikiran bisa adhem lan ayem.
perlu duweni keseimbangan antarane kebutuhan lair lan batin.
.
**lsm

LANDHEP AYANG-AYANG

LANDHEP AYANG-AYANG
.
Ing lebet ati isih ginarit abang
perihe kacocog landhepe ayang-ayang
kedlarang ing lurung pangumbaran
nganti seprene nipakake tatu
Sing njalari ati kelaran
dununge sambat wis ora wilangan
Senajan ta rapuh angga sempoyongan
ora takrasa babar pisan
jangkahku isih jejeg....
senajan tatu iki durung ilang
.
wengi kang sepi....
Dakcritakake marang langit
ing saben grombolane mega
taksampirake angen-angen
mbokmenawa bisa dadi rowang
ngancani aku mbopong sanggan
ngudhari bundhelan
sing ngrenggani dhadha
ing saben unjal ambegan
.
aku isih kelingan
lan selawase.tansah kelingan
nalika panjenengan kirim siji cangkriman
ngenani munyere rodha panguripan
uga bapa adam lan hawa sing kapeksa nampa paukuman
ahh...kabeh mung saderma ngecake lelakon
sing tak ngerteni ...
aku kudu lila ngeculake impen-impen
kumleyang gogrog ing sumilire angin mangsa ketiga ....
Aku pamit saka papan atimu
Lilanana aku lunga kmas
Pancen tresna iku ora mesthi nyawiji
Ing kalane kudu kandheg ing wates pangerten
kabeh mung saderma nglampahi
tresna suci iki daksimpen ing endahe memory.
.
**lest sm,220916

AKU INGIN MENULIS ...

Menulis bagiku adalah salah satu terapi yang baik saat sedang merasa *sendiri/terabaikan/kecewa/sepi di keramaian...
siapapun pasti pernah merasakan seperti itu.
dan knpa tdk aku tuangkan dlm sebuah tulisan walau kemampuan menulisku blm seberapa tapi ingin aku ekspresikan dan tertuang manis untuk mengungkapkan sesuatu melalui tulisan.
.
kata temanku...
Menulislah sebagai terapi untuk menyembuhkanmu dari rasa stress yang melanda lalu publikasikan di blog, media sosial atau kamu bisa menyusunnya dalam sebuah buku yang kamu terbitkan sendiri,
.
tulisan yang dihasilkan dari perenungan yang dalam biasanya akan menyentuh orang lain sehingga mereka juga akan merasakan apa yang kamu rasakan.
dan jangan risau jika temanmu ada yg tdk suka,
kata-kata bersayap biasanya akan menimbulkan multi tafsir,
tetap jd diri sendiri .
dan sangat menyenangkan sekali jika ada yang membaca tulisan kita dan mengomentari/
memberikan saran pada kita, sehingga kita tak lagi merasa sendiri dan terhibur dng kehadiran banyak teman yg peduli..
.
.
**terimakasih nasehatnya..

PENGKUH

PENGKUH
.
Yen tansah pengkuh
kiwa tengenmu bisa pekewuh
ora ana gemreneng sapa aruh
eman yen endahe pasuryan
pinaes sorot kawengisan
srengenge wis meh angslup ing sisih kulon
apa iya jangkahmu isih nerusake lakon?
ngoyak bandha sarana kemunafikan
pangrasa dadi atos pindha dalan aspalan
ora mikir yen kabeh ana pungkasan
sadawane dalan ndhedher kesrakahan
malah wis dadi pakulinan
tansaya ngumbar kadurjanan.
.
lsm,031215