1.ING SISA WEKTU
Kledhange wektu tansaya mangklung
nglewati maneka rasa
susah bungah dadi sesandhangan raga
mecaki dalan-dalan
ing kalane menggok mudhun lan munggah
prenggosan ngampah sayah
sangisore pengarep
Kang tansah dadi pepayon edi
tatag tangguh temeka tujuwan
ing sisa yuswa sing wis surut siji
muga bisa dadi coloking laku
isih ana dina sing kudu piniji ngayahi jejibahan luhur
nggayuh kabagyan lair batin
tumus engga sapungkure wektu
Muga Gusti tansah paring pepadhang lan kanugrahan.
2.GURIT WEKTU
taktandur angen kang endah ing sedya kang makantar
nalika larik-larik ukara
manjila endahe gurit-gurit
abyor ing lumakune wektu
bareng krenteg ati
sing kepengin nguri-uri budaya jawi
lumantar rerakit tembung-tembung kang edi
muga dadi tenger sing bisa anyengsemi
Marang ati kang nedhenge gladhi sastra jawi
aja nganti kelangan suluh
dimen tetep manther dadi obor semangat
Awit jaman saiki para mudha wis lali
lan ora seneng mring budaya jawi
ayoo.....kanca bareng-bareng tresna budaya jawa
dimen ora ilang kependhem ing gumatine mangsa
Yen ora kita njur sapa?
elinga...
kuncaraning bangsa
ana ing gunggunge budaya kang adi luhung.
3.GURIT KATUR BAPAK IBU GURU
Kula niki mung bocah ndesa sing Lola
Keplayu ngoyak endahe impen
Sing pating kerlip ing gebyare langit
mung kekanthen sedya lan gedhene tekad
Nggayuh sakehing
Panjangka kanggo sangu nglakoni panguripan ing tembe mburi
Ing kene
Ing pawiyatan kang asri
SMP negeri Balen setunggal sing daktresnani
Saben dinten kula mituhu dhawuhe
bapak ibu guru sing tansah sabar
Nggulowentah paring tuladha becik
Senajan kula asring damel bapak ibu guru kuciwa
Awit kula asring Lena ing pitutur
Nyuwun pangaksami bapak ibu guru
Sedaya piwulang lan ilmu
Pindha suluh kang manther ing jiwa
Senajan sayah ing raga
Panggah nindakkae jejibahan kanthi Semangat
tansah medhar ilmu
Kanthi sabar lan ikhlas
Jasa lan lelebuhan estu tan winates
Kangge kula lan Sedaya mitra
Maturnuwun bapak ibu guru
Atas Sedaya lelabet panjenengan
Minangka guru ugi tiyang sepuh tumrap para siswa
Sedaya jasa panjenengan
Badhe kaukir ing jiwa
dados prsasati ing sadawane Gesang
Mugi Gusti paring pangayoman
Berkah barokah Sedaya jangkah
Maturnuwun bapak
Maturnuwun ibu
Sembah sungkem kula tansah katur
Sugeng mengeti dinten guru nasional
Dirgahayu ....
Jaya lan jaya salamiya.
.
4.
SUGENG RAWUH PARA TAMU
Esuk Iki sang bagaskara mesem sumringah
Pindha bungahe atiku ing dina iki
Amerga kerawuhan tamu ingkang satuhu kinurmat
Inggih menika pangarsi praja
Ibu Bupati lan para punggawa
Bapak kepala diknas bojonegoro
Saha bapak ibu kepala sekolah SMP negeri se-kabupaten bojonegoro
Aku kudu kepiye iki?
sejatine atiku bingung
Ora ngerti endi sing taktandangi dhisik
Apa sing bisa dakaturake?
Apa sing pantes dakpamerake?
Jalaran sing takduweni ya mung iki
Apa anane
jumbuh karo kahanan kang sinawang
Plataran jembar kebak kembang-kembang
Wit-witan kang agrom
pindha payung kang adhem banget
Kabeh daktata kanthi seneng ati
dimen dadi papan rerenggan kang nentremake rasa
Satenane aku wis ngupaya kanthi Semangat
Dimen para tamu
Karenan ing penggalih
Katrem anggone sanjan ing sekolah SMP negeri siji Balen
Muga-muga para tamu ora kuciwa
Marang suguh gupuh lungguh aruh kang daksugatna
Iki kabeh pancen adoh saka tembung sampurna
Saben dina aku wis ngrumat kebak rasa tresna asih
Ngrengkuh para siswa - siswi lan sekolah Iki
kanthi tanggung jawab
Minangka wujud amanah kang dakemban
Ora mung mulang teori ning uga tak contoni tuladha becik
Mangun karakter Budi pakerti ingkang luhur
Piwulang ketrampilan kang banget mupangati uga dadi pasinaon sing banget dakutamaake
Supaya mbesuk para siswa-siswi duweni sangu ing madyane bebrayan agung
Ngudi kabagyan urip kang mulya
Ndonya lan akherat.
ttd.
Bu lukis wati
PAYUNG RENDA BIRU
payung iki wis sauntara dadi klangenan
dakpaes ing tritis wektu
pindha umbul - umbul lan rontek
gawe sengsem netra
rerenda abang tansaya merak ati
ning ora kanyana
payung renda biru sing dakkanthi iki
dumadakan trocoh lan bolong
kecubles eri paran
driji - driji gemeter ngampah adhem sing ngrambati pulung ati
nggrantes mring dayane rasa pangrasa
yagene payung iki ora bisa nadhahi banyu sing mrembes ing sela-sela renda?
kamangka payung iki ginawe saka bolah kahyangan
sing rinajut dening esem ngujiwat para widodari
payung isih rinegem kebak pamuji
dadi prasasti edi sadawane wektu.
ngajab endahe geganthan luhung
ing sangisore payung
sing dadi pepayon
nalika mendhung saben-saben maesi langit ati
lestari Sahsa Malika
050121
[5/1 6.27 PM] Lestari Sahsa Malika: PAYUNG RENDA ABRIT
payung iki wis sauntara dadi klangenan
dakpaes ing tritis wektu
pindha umbul - umbul lan rontek
gawe sengsem netra
rerenda abrit tansaya merak ati
ning ora kanyana
payung renda abrit sing daksunggi iki
dumadakan trocoh lan bolong
kecubles eri paran
driji - driji gemeter ngampah adhem ilining banyu ngrembes tekan pulung ati
nggrantes mring dayane rasa pangrasa
yagene payung apik kaya ngene ora bisa nadhahi banyu sing mili ing sela-sela renda?
kamangka payung iki ginawe saka bolah kahyangan
sing rinajut peni pinulas sulistya alusing asta para widodari
ing sangisore payung iki
isih ana rupa-rupa gegantha luhung
muga dadi pepayon kang murakabi
nalika mendhung sawayah maesi langit ati
bapoh santosa
kebak donga pamuji
dadi prasasti edi sadawane wektu.
lestari Sahsa Malika
050121
[7/1 9.31 AM] Lestari Sahsa Malika: PANAH SEKTI SRIKANDHI
Dening: Lestari Sahsa Malika
Dhuh ati..
Lerema saka sawernane reribet sing dadi pangridhumu
Lungkrah sayah Kuwi pancen tetenger
Kang aweh tengara mring ragamu
Yen satemene kowe kuwi mung titah lumrah
Panggresah sing ana manah minangka swara batin sing pantes kaesthi
Aja kebacut dadi sumbering lelara
Mandhega sedhela wae
Tata atimu
Tata napasmu
Kuwi ora ateges kowe mandheg saka panjangka luhur
Apa maneh mundur saka angkah kang sinedya
meneng menenga
Tata ambeganmu sing prenggosan
Dimen ora ngangsa-angsa
Jalaran dalan sing bakal kokliwati isih dawa banget
Aja nganti kelangan daya pangupaya
apa Kang wis mbokronce kebak pengarep edi Peni
Reng-reng maneka cengkorongane tujuwan luhur
Aja nganti ilang saka gegemanmu
Muga tipak jangkahmu kang anyengsemi leledhang edhume tetanduran kang ngrembuyung
Bisa maesi bebrayan agung
Dadi sejarah kang kepatri ing tugune wektu
Ora mung Jambu kluthuk sing ijo royo-royo
Ning Ana Pelem madu lan pelem gadhung sing wis kondhang Kaloka nuju prana pra priyagung
Uga Endahe Sekar tabebuya jenar sinangkling tansaya Amrik nyebar ganda arum ngedap-edapi saben pandulu
Tinandur ing sadhengah mangsa
Ora bakal gogrog
Keterak samirana
Pancen angin Kuwi seneng gawe ribut ribet
ngobat - abit sakehing tetanduran
Ning aja wedi
Ora ngira wit-wit kuwi bakal ambruk
Apa maneh pokak
Awit pang- pang sing mangklung kae
Wis tinali Kuwat
Kasangga dening gendewa lan panah sekti para srikandhi sejati
Sing ginawe saka landheping rasa
Mula sing jail seneng ngganggu ngreridhu
Muga enggal sirna
oncat saka pategalan lan plataran sing daktata tharik-tharik Rina wengi Iki
Gusti paringana pangayoman
Tinebihake saking godha lan rubeda.
Aamiin....
211020
[9/1 1.19 PM] Lestari Sahsa Malika: ANGON RASA ANGON MANGSA
wis sawetara duwe kelangenan
klinci blang telon
seneng playon lelumpatan
ing pinggir kali riwe
banyune mili gemlidhik banter
mancur saka apuhe kringet lan luh
kiwa tengen akeh eri sangkrah
uga beling pating crangap
wis wola-wali dakgiring
aja nganti mengkone kena bilahi
ning jejerku mung dhapuk pangon
Angon rasa angon mangsa
mung bisa ngetutna paran laku
tiwas ngenggaki mbengok sora
mung tembung ngayawara
lungguh sangisore wit kluwih
nata napas nata rasa
daksawang klici Blang telon tansaya rikat
ngadoh cat katon cat ilang
ee....ya wis ora perlu kedhungsangan
diumbar wae senajan gronjalan rasa jroning dhadha
mbrebes mili teles kebes jroning jiwa
pasuryan panggah mesem ngujiwat
merak ati....
praupan sumunar
padhang kencar
ya mung pengin ngajab karaharjan kasantosaning jiwa lan raga
Jembar ing manah dimen samubarang katon padhang
pindha srengenge madhangi jagad raya.
Lestari Sahsa Malika
090121
[14/1 7.02 AM] Lestari Sahsa Malika: PANAH SEKTI SRIKANDHI
Dening: Lestari Sahsa Malika
Dhuh ati..
Lerema saka sawernane reribet sing dadi pangridhumu
Lungkrah sayah Kuwi pancen tetenger
Kang aweh tengara mring ragamu
Panggresah sing nggubel manah minangka swara batin sing pantes kaesthi
Aja kebacut dadi sumbering lelara
Mandhega sedhela
Tata atimu
Tata napasmu
Kuwi ora ateges kowe mandheg saka panjangka luhur
meneng menenga
Tata jangkahmu sing prenggosan
Dimen ora ngangsa-angsa
Jalaran dalan sing bakal kokliwati isih dawa banget
Aja nganti kelangan daya pangupaya
apa Kang wis mbokronce kebak pengarep edi Peni
Reng-reng maneka cengkorongane tujuwan luhur
Aja nganti ilang saka gegemanmu
Muga tipak jangkahmu kang anyengsemi leledhang edhume tetanduran kang ngrembuyung
Bisa maesi bebrayan agung
Dadi sejarah kang kepatri ing tugune wektu
Ora mung Jambu kluthuk sing ijo royo-royo
ning uga tetanduran liyane tansaya ngrembaka amrik nyebar ganda arum ngedap-edapi saben pandulu
Tinandur ing sadhengah mangsa
Ora bakal gogrog
Keterak samirana
Ning aja wedi
Ora ngira wit-wit kuwi bakal ambruk
Apa maneh pokak
Awit pang- pang sing mangklung kae
Wis tinali Kuwat
Kasangga dening gendewa lan panah sekti para srikandhi sejati
Sing ginawe saka landheping rasa
Mula sing jail asring ngganggu ngreridhu
Muga enggal sirna
oncat saka plataran sing tharik-tharik tinata rina wengi Iki
Gusti paringana pangayoman
Tinebihake saking godha lan rubeda.
Aamiin.
140121
[14/1 7.15 AM] Lestari Sahsa Malika: Tlatah iki malih sepi nyenyet
ora ana kemliwere tipak-tipak jangkah
sing wingi iwut gladhi maneka gegayuhan peni
gegodhongan wegah obah
wit-wit sanalika nggejejer
pang-pang
ndhingkluk apa ndhangak?
Mbokmenawa ngitung ceceran crita edi
kang nate rinonce
ing sangisore mega -mega biru
sepi
sepa
samun
tanpa ana gemerahe kayun
Januari ndhedher tatu
ing ros-rosane pangrasa njarem linu
ngupadi tamba ana ngendi?
kamangka iki wadi sing kudu daksingitake ngati-ati
dimen ora disengguh ati iki rapuh
jalaran wis dakbundheli sakehing Jimat sekti
kanggo tetulak lelara
Lestari Sahsa Malika
140121
[14/1 7.20 AM] Lestari Sahsa Malika: JANUARI NDHEDHER TATU
Tlatah iki dumadakan sepi nyenyet
ora ana kemliwere tipak-tipak jangkah
sing wingi iwut gladhi maneka gegayuhan peni
gegodhongan wegah obah
wit-wit sanalika nggejejer
pang-pang
ndhingkluk apa ndhangak?
Mbokmenawa ngitung ceceran crita edi
kang nate rinonce
ing sangisore mega -mega biru
sepi..
sepa..
samun..
tanpa ana gemerahe kayun
Januari ndhedher tatu
ing ros-rosane pangrasa njarem linu
dheleg-dheleg tan kuwawa muni
ora bisa sambat
iki wadi sing kudu daksingitake kanthi permati
dimen ora disengguh ati iki rapuh
jalaran wis dakbundheli sakehing Jimat sekti
kanggo tetulak lelaran sing tumama ing jiwa raga iki
Lestari Sahsa Malika
140121
[18/1 5.38 PM] Lestari Sahsa Malika: KEMBANG DOM-DOMAN
Angin semribit ngelus rekma
nalika srengenge nepaki angslup
manuk-manuk bali ing susuhe
driji srawehan ngipatake lelamunan
pangrasa iki isih nglambrang
mbradhati kembang dom-doman rupa ungu
sing thukul mberah ing tlatah manah
pindha sesukeran ngranuhi jiwa
ing kalane nyubles njalari mberet perih
senajan samar panggah dakjingglengi
wanci surup nora katon apa-apa
sing katon mung tipak jangkah sing tracak
lerem sawetara ing napas-napas lila
wengi iki reroncen impen landhung mapak srengenge esuk luwih kencar
ngujiwat sumilak
amadhangi laku
Lestari Sahsa Malika
180121
[14/3 1.36 PM] Lestari Sahsa Malika: KABEH KOK SALAH?
Sing kanggonan mesthi wae moh diarani salah
kuwi ngono jare wadi
mula sok didhelikna dimen ora kena aloke kanca
saben-saben gawe gendra
tembung-tembung abang sinigar
saka ilate sing landhep
temlecek ing Jogan rasa
nyacad liyan sakepenake udele
sing iki jare keminter
sing kae jare pengkoh
sing kono jare kakehan umuk
kabeh kok salah
lha ..sing cedhak kae
salah kaya ngapa jaremu ya bener
apa lali...yen awak dhewe iki
satenane uga nggembol sesukeran ?
ngono kok ya seneng alok kekurangan liyan
eling.....kae lo srengengene tansaya mangklung
ora bisa mbokrekayasa ing lakune
yagene seneng
gawe gela ngudal-udal mala
lungguh sing kepenak ya
sinambi ngunjuk banyu tawa
apa sing umub jroning dhadha
dimen adhem lan tinata.
lestari Sahsa Malika
140321
Tidak ada komentar:
Posting Komentar