PARIKAN ..MANGGA..PARIKAN!!

1 .Blimbing wuluh sadhompol Pitu =

Ngudi kawruh ora winates wektu

2. Sadhompol pitu gogrok ing lemah =

Ora usah metu luwih becik ana omah

3.lemah amba Jenenge plataran =

Aku pengin bisa nulis parikan 

4.plataran aja tanduri wit tales=

Latihan nyerat aja nganti males

5.wit tales godhonge ungu =

Yen males tangeh sregep sinau

6. Ungu Manda abang kembange mawar=

Atiku krasa sayang aja nganti ambyar

7. Kembange mawar mekare awan =

Yen ambyar atine lara tenan

8. Awan- awan dolan ing bengawan=

Ati sing kelaran selawase dadi sanggan

9. Bengawan mili tekan segara=

Katresnan iki ya mung kanggo sira

10.segara ngono Banyune asin=

Apa ora krasa yen takbatin

11. Asin-asin rujak kluweh  =     

Ora isin wong durung kaweleh

12. Kluweh ditandur ing perengan=

Sing sumeh jroning sesrawungan

13.perengan lemahe miring ngetan=

Sesrawungan iku nyambung seduluran 

14. Miring ngetan omahe dhoyong=

Yen guneman aja waton omong 

15.dhoyong-dhoyong kembange salak=

Ayo... omong-omong sing kepenak 

16. Salak legi wetone desa wedi

= Wong galak kancane memedi

17. Wedi mblasah Ing pinggir Bengawan =

Wani ngelah mung marang pangeran

18.  Bengawan ing pinggir ara-ara=

Mring pangeran nyuwun agunge pangapura

19.ara-ara amba tuwuh alang-alang=

Aja ngaruara dimen ati padhang jingglang 

20.alang-alang digawe parem =

Aja disawang mundhak kesengsem

21. Parem didheplok ing Plumpang =

Ati marem nyandhing sing disayang

22. Plumpang klebu tlatah tuban =

Yen sayang aja ngglibetan

23.Tuban bumi wali sing wis kondhang =

Katresnan iki daktulis kebak rasa sayang

24. Wis kondhang wangine kembang melati  =

Aja Sumelang mring katresnan jati.

25. Kembang melati pepasren putri kayangan =

Yen sayang gemati ora bakal kelangan 

Lestari Sahsa Malika

*Denok ayu lestari

Ngadiluhur ,110520

MECAKI LURUNG ALIT

Dakpecaki lurung alit iki

gegancangan kukuhing niyat 

Nrabas lanciping watu-watu

Anuju cahyaning iman

Ing sasi ramadan iki 

dadiya rerambatan satuhu

Ngresiki rereged 

kang tumempel jroning ati

Mblered katon surem

Kalindhes jaman sarwa instan..

Lirwa ing dalan kabecikan 

Anane mung sarwa keplayu

Mburu wektu tanpa eling 

Rina wengi keplantrang uruping nepsu

Ing surup sandikala ayat-ayat sumunar 

Pating tleram gumandhul ing pang mega 

Nlesep Ing kalbu 

Paring suluh amadhangi laku

Anuju ridhone Gusti.. 

aamin ❤️

Lestari Sahsa Malika

040520

EMAN YEN ILANG AYUNE ..MESEMA🌹

Sasuwene iki aku durung bisa mangerteni 

kepiye kudune nyikapi apa sing dadi sanggan sing dumadakan teka ing uripku 

kepiye yen ujug-ujug nemoni dalan rumpil lan kebak sandhungan?

rubeda lan reridhu apa wae sing kaprangguli

nganti bisa anjalari urip 

kaya kitiran,mubeng muser ora ngerti wayah

apa maneh nandhang lara ati merga saka pengkhiyanatan embuh saka pasangan dhewe utawa kanca ...

mesthi ora bisa nggambarake kepiye ngampah sakehing tatu

ing saben mlebu metune napas.

ing wektu iki 

aku pancen durung pantes duweni ati sing resik

Sing bisa dadi panutan

dudu kapasitasku nuturi

kanggoku yen aku nulis 

*kata mutiara

*motivasi diri

*sangu leladi

iku ya mung kanggo nuturi awakku dhewe.

Njur takcenthelake ing dinding sosmed

sapa ngerti ana kanca 

kersa maca lan ana manfaate

aku ngerti 

yen kabeh wong iku bisa berubah 

Dadi pribadhi sing luwih apik lan wicaksana.

amerga wis kasil nglewati sakehing permasalahan 

piye reka dayane ngudhari ribet 

Sing gawe peteng pikir

rumangsa kasiya-siya lan sengsara.

ya..mbokmenawa saka maca-maca tulisan sing kebak pitutur utawa motivasi 

kanthi reroncen ukara sing endah 

Bisa dadi panglipur ati 

bisa nggugah semangat

Ora kedlarung ing kesedhihan.

Akon-alon bisa bisa dadi pribadhi tangguh lan mandiri...

urip iki pindha mapan jroning alas gung liwang-liwang 

kebak eri lan maneka rintangan.

yen gampang nglokro 

endi bisa uwal saka keruwetan urip

perjuwangan lan semangat tansah diudi 

kareben tetep bisa kuwat.

Lan mengkone mental lan karakter bakal teruji.

nalika sikil jumangkah 

Ing dalan kebak krikil

Tatu lan perih wis ora bisa den endhani.

munggah mudhun ing dalan rumpil 

menggak-menggok anjalari kojrat lan sambat.

rinasa urip kebak kasangsaran lan kijenan.

adoh lor adoh kidul

Kanca ngilang ing saben enggokan

iki sing jenenge epesode urip 

Nemahi lelakon sing banget rekasa

kabeh kuwi sejatine guru 

sing ngajari dadi pribadhi tangguh..

pribadhi tangguh iku 

dudu sing ora nate nangis nalika nandhang coba

nangis iku ora mujudake kelemahan.

lumrah sapa wae dikeparengake nangis.

mbokmenawa saben tetesing luh iku bisa ngenthengake sanggan jroning dhadha ..

ora apa-apa

aja dibendhung,nangisa...

ora usah isin kuwi jeneng lumrah utawa manusiawi.

ning.. aja suwe-suwe

Enggal diusapi luhe njur mesema....

Eman..yen ayune ilang 

kesaput deresing Luh

Mesema..mesema ya

Bareng mletheke srengenge 

sumunar kencar-kencar😍

*ndreminil ing tritis awan 

Sacebloke Ukara...Bu les🤗🤗

040520

POKAK *GURIT ING TRITIS AWAN

POKAK

Rikala ati lan pikir wus reged

Apa wae mesthi ora kaanggep  

Anane mung sarwa ora mranani ati

Saobahe Tansaya nggegarit ati

Kedadeyan ing endi papan

Aji mumpung Gampang rampung

Wis dakbundheli sajroning ati

Nalika angin santer nibakake warta

Saka sempyuh rerasan batin

Kang dadi reribeting pikir

Pengin daktimba

Ning emane taliku mung sadhepa

Ora kuwawa datan sulaya

Ya mung winates panjangka

Kukuh ing pecak jangkah

njegur ing kedhunge rasa

Ning kebak tidha-tidha

Pengin dakranggèh

Samar yen anane kêwêlèh

mung kandheg ing pengangen

durung klakon wis pokak ing kayun

Kapan bisa rinegem ing driji?

Kamangka kabeh pepenginan

Kudune nglewati perjuwangan

Ora mung tembung ngayawara

Kaya endahing pangimpen 

Pindha manuk kang mabur dhuwur

mung luru mareming rasa

Pencolotan ing pang Mega

Datan sumelang kelangan arah

Binarung angin ngoyak wayah

nut tumibane pandum 

kang wis ginaris ing langit

Mring maneka panjangka kang asring cidra

Ning aku isih duweni kapitayan

Kang dakugemi kanthi kukuh

Mapan jroning dhadha iki

Marang sekabehing lelakon 

Mbokmenawa minangka pandadaran ngaurip

Dadi tapel watesing tekad

aku bisa methuk kabagyan

Jalaran Gusti bakal Paring piwales tan kanyana

mring wutahe kringet 

Ilining banyu netra

Ing kana ana rupa-rupa perjuwangan 

kang satuhu mlintir pangrasa

kebak rekasa panelangsa

Mung gedhene rasa syukur 

Sing dadi sumbering katentreman batin. 

*Ndreminil ing tritis awan

Denayu😷😷🌹

Gurite bules,030520🤗

PUISI *PLUS~3 @KURATOR BPK ARIF GUMANTIA ✓KETUA MAJELIS SASTRA MADIUN

1.  

menjelajah embun 

Pada rerumputan pagi

bersenyawa dalam gigil

sepenggal napas menghirup rindu

berayun pada jarak yang hampa.

2.

Tetaplah begitu

Mencandai waktu

bersembunyi digempita angan

agar selalu tumbuh rindu 

Yang tertanam dibarisan aksara 

Pada musim paling semi...

3

Di semesta yang agung   

Ku jumpai keindahan puisi

Menghanpar tanpa batas

ku eja sebagai ayat-ayat suci

pada langkah kecil tertatih 

Selalu ku seru keagunganMU

Sebagai penyangga jiwa yang rapuh

4

Di ujung malam doa-doaku tumpah

resah ditepian munajat

Dadaku bergetar

Wajah dosa terkapar lunglai

Nampak retak cermin hati

Ampuni aku Gusti

Lestari Sahsa Malika

020520