REKMA MALIH RUPA (Lestari Sahsa Malika)

REKMA MALIH RUPA

Esem pucet tan bisa kapaeka

 

Sakehing pralampita tharik-tharik 

Rinoncen kembange rasa

Ana pesen sinandhi ing kaca pangilon  

Daksawang kanthi permati

Ing pilingan kiwa tengen

Ora dakselaki wis ana tengara kang kudu daktampa

Ana rekma sing malih rupa

Mrapak tan bisa kasingitake

 

Anteng kitiran obahe pikiran

Mburu wektu nguber gebyare Donya 

panjangkah mung nipakake ampang

Kekendhangan angin kalungse

Kamangka lakune srengenge tansaya nyedhaki surup dalu

Njur apa sing kudu  dakgawa bali?

Gegetunan mung nggedhekake sanggan jroning jiwa

Tansaya ringkih mung bisa sumendhe mring Gusti...

Muga ing langit sore manda jingga iki 

isih ana papan palereman kang bisa ngedhemake jiwa..🤲 

Lestari Sahsa Malika ❤️

TATU IKI

Reroncen kidung ati

kumlisiking kapang tetabuhan jroning dhadha 

Sesriwetan binarung santering  samirana 

Ing pungkasing sasi juli 

Tembang kapang angewuwung 

Ning ya mung krasa ampang  

Pindha wohing randhu sesondheran ing pang garing

 

Pokak ora kuwawa nyangga pangoyake kahanan

mbokmenawa iki tengara 

Marang ati alit iki

kapuk-kapuk mumbul 

ngawiyat tanpa juntrungan

Tembung memanis satemah mung lamis

Nadyan mangsa wis gilir gumanti 

Kudune aku bisa lali...

Ning yagene tatu Iki 

tansaya igit-igit ati.

Bunda Lestari Sahsa Malika