1.PITUTUR BECIK
Pitutur utawa sangu leladi
yen gelem ngresapi
Bisa dadi colok laku mecaki urip
maneka prakara sing kadhang ngedhang laku
muga bisa kasikapi kanthi samesthine
jer wiramaning urip owah gingsir
pletike nalar sing bening bisa dadi setir lan bisa nyumurubi endi dalan sing bener:-)
2.KRUDHUNG UNGU
Semburat kledhange slendhang
Nyawur aruming kembang tresna
Rupa ungu kemelun ing kalbu
Esemmu kang sepet madu
Sumampir ing pangrasaku
Kapan baya sliramu paring idi?
Marang aku kang nandhang branta
Swaramu kang aris satemah ndudut ati
netramu sumunar aweh pepadhang
Wanita sulistya pepaes krudhung ungu kinanthen lipstik Abang jambon ing lathi
nambahi pantes katon besus ngadi salira
Dhuh..,,wong ayu
Aja pijer mbebeda
Ati iki ora kuwawa
Mbendhung wohing panggantha
Guyumu reroncen pasemon
Kang mbukak atine jalu
Dakanti Ing tapel wates angslupe surya
Yen sliramu ngerti
ana ati kang banget tresna
Kagiwang kumlebate krudhung ungu .
3. PANGUCAP IKU DONGA
Pangucap iku pindhane donga
Micara awon bali ajange
Micara apik bakal ketitik
Sing ngati-ati ngobahale lati
Siji sing wigati
mungguh ing sesrawungan
Sampun ucul saka niyat kekadangan
Mring kabecikan ngangsu kawruh sesarengan
Yen ana kledhange rasa enggal sesarengan dilarung
Kareben mboten kedlarung
Yen Aku lali tulung elingakna
Yen Sliramu lali aku kang tuhu ngelingna
Ora ana manungsa Sarwa sampurna
Muga Gusti sing bakal ngemutake
Kudu duweni wates ing aran pantes
Kang bisa nuntun Tansah mawas dhiri
Aja nganti lirwa ing pakerti
Tansah memuji mring kesaenan
Sadawane pecak jangkah
Ndlidiir nut swara ati
Kadya Banyu Mili...
Pengangen kareben dadi pamecut
Rembugan ngupadi dununge piterang
Pangudarasa ngluru bawera rasa
Pangeman krana rasa sayang
Iku mono Pepaesing jagad sesrawungan
Bisa mapanake ing patrap kang trep
Tinulad mring para sumitra.
4.
GEGAYUHAN LUHUR
Rasa sumelang jroning ati
wus dakkintirake ing kali pacal
Bareng kumleyange ron garing
Rikala kelip lintang sumunar peni
Lumakune tanpa tumoleh
Pindha tekad jroning ati
Nut sepira teteging ati
Ngarah jejege sedya kang tumuju
Kanthi bungah tanpa wegah
dakpecaki dalan dawa iki
Ngupadi dununge papan kang reja
Wiwit esuk engga srengenge lingsir
Senajan tapak sikil asring tatu
Ora dadi pepalang babar pisan
Linambaran puji
Sumendhe mring Ridha Gusti
Dakgegem raket dadi sangu sadawane lumaku
Ndremimil tanpa leren
Ngrapal sakehing dedonga
nyadhong kawelasan Gusti
kang maha wikan,,,,
Senajan pecak jangkah sayah
Nanging ora kudu takrampungi
Adoh kaya ngapa....
daksengkut nguber gegayuhan luhur
Jroning dhadha tansah manther
Suluh kang madhangi tekad
Ngranggeh gegayuhan sayekti
Kang tansah kudu kaesti
Marang rembulan kang kencar
Daksilih sunarmu ngiringi laku ku
Engga ing titi wanci mengkone
Bisa takpethik lintang -lintang saka sisihmu
Kang takgambar peni rina lan wengi
Muga bisa kasembadan Lintang kae ana ing pangkonku ....
5.TANSAYA TUWA
Bener kandhamu...
Yuswa tansaya kurang ing wilangan
Kamangka dosa isih dadi sanggan
Maesi saben pecak jangkah
Yagene durung pana?
Lumakune dina nut pandom jam
Ora gelem ngenteni sing keri
Lan lumoh reresik ati...
Mung bisa nyadhong pangaksama
Mring Gusti kang maha welas
mbaka sithik rereged iki
Pengin daklarung ing ilining dina
**
Mengeti dinten lair kula 160219 kaping 46
mugi GUSTI tansah paring kanugrahan
Yuswa ingkang berkah ...aamiin ya robb:-):-)
6.
ANAKKU CAH AYU
Ndhuk...Anak ku cah ayu
Dina iki wis tambah wilangane yuswamu
Puji syukur ing ngarsane Gusti
Muga dadi wanita kang utama
Takkudang rina lan wengi
Senajan dalan sing koklewati
ing kalane ana enggokan
munggah lan mudhun
Aja sumelang ....
Iku minangka pandadaran
Anuju papan kang reja
Donga ibu tansah mili cah ayu...
Pindha gemriciking banyu sendhang
Kang ora nate asat
Senajan katiga ngerak
Iki payung pepaes godhong waru
Sawayah-wayah udan ngreceh
Uga panas srengenge semelet
Ngiyuba ing sangisore payung iki
Rupa abang jambon kinanthen renda seta
Minangka wujud tresna lan asih saka ibu
Dadiya bocah pinter ya ndhuk
Tansah sehat lan bekti
Mituhu pitutur bapak lan ibu
Muga sadawane lakumu Tansah Rahayu widodo
Kalis ing Sambikala
Aamiin yra...
080618
7.POKAK
Rikala ati lan pikir wus reged
Apa wae mesthi ora kaanggep
Anane mung sarwa ora mranani ati
Saobahe Tansaya nggegarit ati
Kedadeyan ing endi papan
Aji mumpung Gampang rampung
Wis dakbundheli sajroning ati
Nalika angin santer nibakake warta
Saka sempyuh rerasan batin
Kang dadi reribeting pangrasamu
Pengin daktimba
Ning emne taliku mung sadhepa
Ora kuwawa datan sulaya
Ya mung winates panjangka
Kukuh ing pecak jangkah
njegur ing kedhunge rasa
Ning kebak tidha-tidha
Pengin dakranggèh
Samar yen anane kêwêlèh
mung kandheg ing pengangen
durung klakon Ning wis pokak ing kahyun
Kapan bisa rinegem ing driji?
Kamangka kabeh pepenginan
Kudune nglewati perjuwangan
Ora mung tembung ngayawara
Kaya endahing pangimpen
8.
LELAKON URIP
Pindha manuk kang mabur dhuwur
mung luru mareming rasa
Pencolotan Ing pang Mega
Datan sumelang kelangan arah
Binarung angin Ngoyak wayah
nut tumibane pandum kang wis ginaris ing langit
Mring maneka panjangka kang asring cidra
Ning aku isih duweni kapitayan
Kang dakugemi kanthi kukuh jroning dhadha
Marang sekabehing lelakon iki
Mbokmenawa Minangka tapel watesing aku bisa methuk kabagyan
Jalaran Gusti bakal Paring piwales Tan kanyana
mring wutahe kringet lan banyu netra
Ing Kana ana
Rupa-rupa perjuwangan kang Estu mlintir batin
Nalika Mrangguli Lelakon kebak rekasa.
9.
JEJEG MRING IMAN
Mecaki dalan panguripan
Mesthine akeh sandhungan
Siji sing mesthi....
Aja lirwa ing kabecikan
tansah Gegondhelan mring kapitayan
Amrih jejeg dununge iman ...
Ora usah keli mring gebyar
Aja monat- manut
Polahe mung anut grubyug
Mring samubarang sing ora patut
Tindak sapecak
omong saklemah kudu ngati-ati
ora diarani wong sing hebat Ora dadi ngapa....
Sing baku lakumu manggih rahayu...
10.
PESISIR KAMBANG PUTIH
Ing pesisir kambang putih
Dakumbar playune angen
Ngetut gemulunge ombak samodra
Sinambi engggar-enggar lejaring ati
Kijenan ngronce sepa sepi
Ngupadi kabagyan kang kumleyang
Ing kene kelingan rupa-rupa kenangan
Daksalami mbaka siji binareng sepi kang nguleng rasa
ngebaki dhadha....
Dakcawuk semilir angin
Kang kumlawe ing pucuk ron cemara
Nelungake rasa nglangut jroning ati
Peksi-peksi pencolotan ing pang garing
Sesondheran ing kedhep netra
Tansaya anambahi gorehing nala
Ana kledhang wewayanganmu
Kang dumadakan teka
Tansaya nambahi panelangsa
Mring ati kang nandhang kapang iki....
11.
GAMAN SEKTI
Nggedhekake koneksi
Minangka gaman satuhu sekti
Ndhudhah pethi isi kursi aji
Ngenteni sing suguh mring endahing janji
Nora eling dina mburi
Mbesuk beja apa cilaka?
Aji mumpung padha nyemplung
Njur kemaruk .....
ing jaman saiki
Endahing bebudi akehe wis musna
Jawor ing kembange donya
Tumpang Suh mring sesuluh
Jatining dhiri kabur kanginan
Ora bisa jejeg nyangga kautaman
piwulang lan Pitutur luhur tansaya luntur
Kabecikan pindha ancik-ancik eri
Asring cidra
mung Wedi Ora duwe wadya bala
Njur kapilut gebyaring Donya
12.
PAHLAWAN TANPA ARAN
Gawang-gawang ing kedhep netra
nalika simbah wiwit ngrayuk kenangan
Ing tumapak surya kapapak dalu
"Cuwilan-cuwilan crita iki nyacah ati
Kang banget nguras luh ..ndhuk"
Kandhane :
Perang kuwi nipakake perih jroning ati
Kelingan mbiyen tanpa leren
ilining ludira prasasat nelesi bantala
Para pejuwang nrabas pluru ing palagan
Datan perduli mring keslametan dhiri
Semangat makantar pindha obor kahyangan
Cecoloking laku ngiring lanciping pucuk pring
Swara pluru rina wengi ngrangin
Nyentak rasa nggugah jiwa-jiwa mudha
Playune Wektu ora bisa semaya
Sawayah-wayah kudu siyaga
ndhepani pertiwi tohing nyawa
Kanthi tekad kang kuwat
Senajan senjata sarwa prasaja
Manunggaling Rakyat lan tentara
Dadi sesanti ngrebut kamardikan
Lan Sandikala iki dadi saksi
Kembeng-kembeng kaca ambyar
Ing plataran atine simbah
Sempyuh ing pasuryan sepuh
Nglangut....ngumbara ing jaman perang
Kelangan bandha lan sanak kadang
Ngegla ginambar ing jroning dhadha
Muga GUSTI paring pepajar
Mapan ing swarga langgeng
Katur pahlawan bangsa tanpa aran
Uga simbah miran ....
Tansah Bagas waras yuswa panjang
MERDEKA..!!
13
KABOTAN SANGGAN
Ibu pertiwi dhuhkita
Mbuh wis pirang kolah luh sing kutah
Nyawang wong-wong mung regejegan
Rina wengi mung rebut panguwasa
Ngumbar sesorah sadawane dalan
Ati rinujit perih namdhang sungkawa
Jalaran polah tingkah para putra
Wis lali marang perjuwangan para pahlawan
Kang rinebut kanthi tetesing ludira pungkasan
Ana endi ilining semangat kang banyu mili
Kang mbiyen ngiring pecak jangkahmu?
Saiki kaya-kaya wis garing ngringking
Ilang musna kebrongot nepsu angkara
Wis Ora katon ngrembuyunge persatuan
Kang dadi gegondhelaning rasa
Sawangen.. bumi kelairanmu saiki..!!!
mbedhoyot kabotan sanggan
Mung bisa sambat tan kuwawa muni
Nggadhang baline karaharjan
Kapan baya bisa menangi jaman reja
Dhuh...para pejuwang sejati
Aja lirwa ing katentreman negeri.
14
SANG PAHLAWAN
Tapak jangkah pating blasah
Jronng taman kusuma asri
pinaes aruming kamboja amrik
Angambar arum sadhuwuring prasasti
Senajan mung rupa biru lan bisu
Sangisoring sumare satriya utama
Kang sinebut sang pahlawan bangsa
Lila kelangan nyawa ing palagan
Nrabas deresing udan pluru
Senajan pungkasing ambruk rinengkuh bumi
Tekad lan perjuwanganmu tansah dadi obor
Ing sanubari para generasi penerus bangsa
Tipak jangkahmu ora bakal ilang
Senajan wis ganti jaman...
Dakkirim donga pamuji marang Gusti
Mugi swarga kang pantes dadi paleremanmu
Ing taman pesareyan para pahlawan
Esemmu dakulati kebak rasa bekti
Kamardikan bangsa wis ana gegeman
Bisaa nuwuhake semangat para mudha
Ngisi lan negesi apa ta sejatine merdika?
MERDEKA..!!
15.
KACIDRA
Semburat cahya sang surya
Ginelar ing jembare jagad raya
Biru cakawala pinaes mega-mega
Esuk kang banget nuwuhake sengsem
Rumangsa bombong ati iki
Nyawang bumi kelairan loh jinawi
Ijo royo-royo tansaya elok ibu pertiwi
Ning emane....
Ing sadhengah papan ana sing ngregedi
Ngrusak ,ngapusi ,lan korupsi
Kaya wis dadi penggaweyan aji
Ati rinasa perih lan sedhih
Nyawang ibu pertiwi netesna luh
Saben-saben kelaran nampa bebendhu
Jalaran polah tingkah kang nerak tatanan
Panjerit mung kandheg jroning batin
mung nyadhong kawelasan GUSTI kang maha wikan
Dheleg-dheleg ing tritis esuk
Yagene mung rerembug udhu penemu
Pungkasaning mesthi tukar padu
Ngluru bener nganti keblinger
Tundhane mung rebut balung tanpa isi
Dakgadhang baline katentreman
Mesthine kamardikan padha duweni prestasi
Dadi tujuwan kang tansah diugemi
Ngisi lan negesi makna perjuwangan
Ora ngrusuhi lan ngisin-isini negeri
Maju lan jaya indonesia ku
Kanthi sesanti :
rukun agawe santosa
Crah agawe bubrah
MERDEKA...!!
16.
REBUT BENER ?
Silih ungkih rebut bener
Adu sesorah rerembug saru
Mripat kebak samudana
Sabela mring wadya bala
Gemerah adol crita ngayawara
Geter palu ing meja pradhatan
Gawe horeg ibu pertiwi
Sesumbar gawe miris ati
Korupsi sapa sing korupsi ?
Panuding adreng mring pandakwa
Ning duratmaka luwih limpat akale
Sesingidan ing laci meja kekunci
Jaman wis owah saka pranatan
Ana sengkuni mulang ngaji para santri
Ngelmu bulus dadi gegaman sekti
Ana tangis kelayung-layung
Para sudra akeh soroh nyawa
Rasa pangrasa malih waru
Panyawang mung sarwa klawu
17.
REJEKI ORA BISA DIOYAK LAN DIOYOK
rejeki mono ora bisa dioyak
Apamaneh dioyok
Kabeh wis ana takerane
aja mesasa mring nepsu
Sing bisa nata ati amrih legawa ngadhepi maneka rupa-rupa pacoban urip
Aja kemrungsung
Yen kanyatan ora padha karo angen
Ora usah kedlarung ing rasa kuciwa
Sabisane ditampa kanthi legawa
Sapa ngerti iku dalane kanugrahan
Sing bisa anuju kasuksesan
Muga Sapungkure luwih prigel lan ati-ati nyikapi kahanan kanthi wicaksana
Sebab pengalaman iku minangka guru sing paling apik
Lan Tansah sumendhe mring kuwasaning Gusti kang maha Rahman lan Rohim.
18.
PINDHA KACA
Ati iku pindhane kaca
Sithik wae kena anteman utawa goresan
Bisa rentak lan pecah
Mula sing ati-ati ngobahake pikir
Ati iku alus ing pangrasa
Kudu asring reresik
Kanthi instrospeksi dhiri
Ing Kono Sawernane rereged bisa tumempel
Pungkasan bisa kusem lan klawu
Mula yen pengin ati Iki tetep wening
Bisaa njaga ati saka prasangka ala
Yen ora patiya condhong mring kanca utawa tangga
becike meneng ngadoh sawetara
Kareben edhum lan anteng obahe nala
Ora usah semon-semon
Ora ngrasani iki kae
Iki Bisa ndadekake ati tentrem lan ayem
Ora sumelang uga was-was ing rerasan sing njalari Gela
Tur maneh iku penggaweyan sing Tanpa guna
19.
PUNGKASING MUNG SEPI
Dakpeneg gemuruh jroning dhadha
Binarung semilir angin mangsa katiga
Larap larap bledhug Ngelus netra
Nggiring angenku marang panggrahita
Yagene ...kudu ana lelakon iki?
Lelamisan kang winungkus endahing ukara
Ngglandhang ati ing pangumbaran
Nrabas landheping pangrasa nipakake ngeres linu
Pungkasaning mung ana sepi
Sesambatku ngaruara Ning tanpa swara
Lungguh setimpoh
Mbendhung ilining banyu netra
Kang saben saben mili sauruting pipi
Nyawang langit tansaya klawu
Ah....sasi november kaping 10 iki
isih ana tatu
Njarem biru jroning kalbu.
Lestari Sahsa Malika
<denok ayu lestari>
101118
20.
ING PUCUK SORE
Sore ing sasi november
Kebak kaendahan kapaes ing langit Manda jingga
Katon Ngegla anyengsemi ati
Mega-mega dhedhampyakan
Nggiring surya ing wates cakrawala
Umpama panjenengan ngerti kangmas
Ing pucuk sore iki ...
Isih ana ati kang nandhang kapang
Ngudang baline esem kang ngujiwat
Ngronce tembung ing larik-larik gurit
Kaya biyenTan ana leren ....
Ing angslupe surya iki
Yen panjenengan ngerti
Ana kutahe luh saka ati sempyuh
Nut ibere pengangen lebur ana deresing udan
Jebul....sepi iki nyacah manah
Rojah rajeh satemah nglinthing garing
Kalindhes sepi tanpa tepi.
21.
ISIH ANA TATU
Ati Iki isih nandhang tatu
Saka landheping ukara biru
Mbedhoyot dadi sanggan jroning atiku
Sore klawu
Dakpecaki lurung cilik iki
Mbokmenawa wae isih ana esemmu kang biyen daksimpen ing pucuk papringan
Sinungging ing antarane semilir sanirana
Daksawang kelip lintang akasa
kang Tansah setya marang rembulan kae
Ning emane aku Saiki kijenan
tanpa panjenengan...
Dleweran luh saka ati kang sepi
Dalan iki wis nugel tali katresnan
Senajan ta wis bakuh kayangapa
Ning kanyatan kudu daklilakna kari kenangan..
22.
WIRANG RASA
Dakkira kembang tresna rupa Abang jambon iki
kang dakronce bareng sliramu
Bakal selawase kapaes ing plataran atiku
Angambar arum dadi kelangenan Rina wengi ing jembare rasa
Ning jebule ora kanyana
bisa nuwuhake cuwa
Mesthine aku ngandel kandhane angin dalu
Katresnan bisa
anjalari wirang rasa
Senajan Amrik angganda wangi
Ning mung sakedhep netra
Janji kang rosa
kaya bisa ngrubuhake dhuwure gunung
Kanyatan amung sawetara
Ya wis aku ora apa apa
Iki pancen kudu dakprangguli
Lelakon kang banget gawe pingget
Nunjem dadi tatu
Pindha tugu sadawane laku
23.
TANSAH SEMELEH
Ati sumèlèh
Suku têtêg jumangkah tan tumolèh
Sangarêpan bakal ana pikolèh
Tinampaa éklas
Krana isih bakal ana manèh
Tansah bisa ngemong rasa
Senajan ta jroning dhadha gemuruh
Tindak sapecak
Ucap saklemah
Tansah katon sumeh lan mranani ati
Balang binalang piweling bab kabecikan
Datan kapituna tumeka puputing jaman.
24.
GURIT SORE
Gurit iki kanggo sliramu
Tresnaku tansaya ngrembaka
Datan leren ngronce panjangka
Nasak dalan rumpil kebak rubeda
Miyak alang-alang kebak eri carang
Nyabrang kali nglangkahi jurang
Ing wengi sepi sesuluh lintang
Aja banget sliramu tega
Ngrerujit ati garing iki
Singidana ing puthuke mega-mega
Isih setya tuhu anganti tekamu
Senajan mangsa ketiga ganti warsa
Temeka mendhung tumelung ing akasa
Pengarepku mung siji
Pindha bun esuk nelesi ati
Sliramu dadiya sesulih getun
Tresna iki aja nganti mati
25.
AKU PAMIT
Daksuwun kelip lintang
Tansah kepanjer ing langit atimu
madhangi saben wengimu
Larikane ukara kang biyen karonce
Minangka sesulihing tresnamu
KalA-kala isih dakwaca
Tembung-tembung rinakit
Ngelingake pangemanmu marang aku
Ahh..
Mbokmenawa ana sing kacicir ing tapak dina
Kandhamu
jenengku punjer donga-dongamu
Yagene saiki sliramu lali ?
Wewayanganmu
Tansah kliteran tanpa leren
Nggubel ilining napas
Saben tembang kangen ngrangin
Kaca-kaca bening ambyar
Mblasah ing plataran ati
Mbrengengeng ngrujit nala
Prasasat ngudal tatu lawas
Tresna lan gela dadi siji
Aku sing luput
Kebacut kleleb
ing sendhang pangimpen
Pungkase katrem jroning dhuhkita
Ya...wis kangmas
Aku pamit
Aku lunga
Saka papan atimu
Mbokmenawa ati iki wis sayah
Kesel dening pengarep
Kijenan nguber impen samar.
26.
ING SAJADAH TUWA
Ing sajadah tuwa iki
daksuntak sekabehing panggresah
Sing nggubel jroning manah
Mbedhoyot dadi sangganing jiwa
Aku kang sasuwene Jumawa ing pangrasa
Rinasa kebak rereged
Burem Adoh saka cahyaMU
Ing sajadah tuwa iki
Dakluru sih welasing Gusti
binarung ilining luh
Semendhe marang kapitayan
Sing kari satlenik
Kacicir ing lurung wektu
Dhuh Gusti
Paringana pangapura
Kawula ingkang kebak dosa
Kinemulan rereged donya
Mugi paduka paring pepadhang
Kawula ngupadi dalan anuju Ridha lan swargaMU.
27.
KACA BENING
srengenge esuk nrabas cendhela
Dakranggeh esemmu kang ngujiwat
Bisaa ngangetake ros-rosaning nala
Sumrambah ing bening kaca maya
Ngilangake lungkrahing rasa
Manjila maneka prasapa
pinaes ulat kang padhang sumringah
Ngajab berkah ing endahe silahturahmi
bening kaca maya
Tansaya sinawang gawe sengsem
Mantulake gambar kang merak ati
Ndadekake ati tansaya tentrem
Sapa aruh ing reroncenan basa jawi
Anambahi bombong lan bungahing ati
Daksuwun muga padha mengerteni
Siji anggit kadhang beda arti
Driji-driji minangka saksi
Endahe geguritan pindha kembang jaman kang aji
Ngrembuyung ing sesrawungan dakrumpaka temaka puputing yuswa
Bismiillah....
Esem-esem Dakgambar ing kanvas biru
Dakulati saben kalodhangan wektu
MUGIA TANSAH MANGGIH RAHAYU.
28..
PAYUNG ABANG JAMBON
Payung abang jambon
Tansah dadi pengayoman
Saka apa wae sing dadi reridhu
Ing semelet awan ngenthang-enthang
Ing grimis bedhug ndrandhang
Senajan wus klawu keterak mangsa
Ora dadi ngapa
Sliramu Nate kandha
Bakal sumandhing lan setya tuhu
Engga oncating nyawa
Dakelus kanthi kebak sayang
Nalika lelungguhan ing tritis sore
Dakpulas maneh gambar kang wiwit surem
godhong waru manda-manda jingga
Payung abang jambon
Senajan Renda wis akeh sing bolong rojah - rajeh
dakdondomi kanthi lila ati
Dakkanthi ing saben mangsa
Ngelingake marang lelakon
Sepisan pepanggihan
Engga Gusti paring kanugrahan
Nyawiji ing katresnan sejati.
29.
.USAHA LAN DONGA
Kabeh titah ing alam donya
Mesthi duweni lelAkon lan crita
Ora ana wong ujug-ujug beja
Bisa kacukupan ora kurang apa
Mbokmenawa iku mung ing layar kaca
Nyuguhake maneka urip sarwa sekeca
Ning ya sejatine mung ngayawara
Kanggoku
Urip iku kudu ngupaya lan mbudidaya
Kaya manuk sing sigrak ngegarake swiwi
Miber nrajang mega-mega
Kekitrang nut samirana
Nganti tumiba ing tlatah reja
kasembadan kang sinedya
Muga Gusti Allah
Tansah paring nugraha
Marang Endahing kabagyan
Kang tanpa kanyana
Tetep usaha lan tansah ndedonga
Aja ngersula lan sambat ngaruara
Bismillah
Lahaula walla kuwwata
30.
GRIMIS WENGI
Grimis ngriwis ing sepi wengi
Nggugah marang kenangan
Kemriciking banyu ndhudhah tatuning ati
Rasa pangrasa ngulandara
Nglambrang ing awang-awang
Nglari janji ing sela mega
Rembulan Pucet
Mbokmenawa wis sayah
Andum sunar ing saben wayah
Udar ing samar pandulu
Daktata gemuruhing rasa
Sumeleh marang lumakune dina
Selawase Langit isih rupa biru
Bakal ana rembulan moblong
madhangi jiwa kang lungkrah
Kanthi nyadhong kawelasan
Gusti kang maha kuwasa
Maturnuwun Gusti.
31
.MUMPUNG ANA WEKTU
Saben-saben kesandhung Masalah
Lagi padha eling marang kang kuwasa
Ladalah,,
Wingi-wingi padha ana endi?
Kinemulan gebyaring donya
Lali marang sapadha-padha
Njur jumawa
Lali yen ana sing ngawasi...
Nyathet saobahe ati lan lathi
pinter banget dhapuk iki kae
Ngecakake lakon ing drama panguripan
Ohh ....ya bener
Pancen urip iki pindha panggung sandiwara
Lelakone maneka warna
Umpama Dadi pejabat mesthine sing amanat
Aja malah dadi rereged ing madyane bebrayan
Ning ya tak ngerteni
Umpama aku dadi pejabat
Apa ya mesthi mripat iki ora sulap?
Ahh ya embuh
Rusaking tumindak
Sing njalari kadurjanan
merga kapilut gebyaring kadonyan
Marang wong sing ora kuwat iman
Mumpung isih ana wektu
Ayo padha instropeksi dhiri
Ing endi papan bisa dadi panutan
Ninggal kesaenan
Kanggo sangu sowan mring Gusti
32.
WONG NDESA
Aku wong ndesa
Uripku mung prasaja
Ning sugih donga.
(Haiku)
33.
DONGA IKU
Donga iku ora mung merga ana rubeda
Donga iku ora mung merga ati kuciwa
donga iku ora mung golek alem
Ning...
Donga iku Sarana rumaketing titah marang Gusti
Donga iku minangka gaman kang landhep
Donga iku kanggo cekelaning urip
Apamaneh dongane ibu
Sanalika bisa nembus langit sapitu
Aja kumawani lan mbantah
Tansah Bekti lan mituhu marang ibu
Kinanthen usaha lan donga
Muga Gusti ngijabah sedaya kang simedya.
35.
SEMPYUH
Ati kepleh
Sempyuh ing ulengan pikir
Ambyar ing kembeng-kembeng kaca
Pecah anelah pategaran jiwa
Lemes sakujur anggaku
Sempoyongan tanpa tujuwan
Pindha wit randu getas
Tugel dening angin santer
Thenger - thenger tan sulaya
Ngampah tatu jroning dhadha
Ngranggeh sisaning kapitayan
Sing kari samenir iki...
Bisaa dadi kanca sapungkure crita
Senajan dudu kenangan sing Edi
Kepara gawe pinggeting ati
34.
URUPING DAMAR
Mungguh uruping damar
Tansah Dakjaga amrih panggah sumunar
Senajan mung satlenik
Muga bisa ngilangi samar
Minangkani pambengoke swara ati
Marang sekabehing rasa pangrasa
Kang daksuntak ing bawerane panjangka
Mugi Gusti paring idi
Mring raga lan manah ingkang Tansah semangat
Nguri-uri endahing budhaya Jawi
Ingkang Rinakit Ing gurit
Aamiin.,
36.
RAJAH TANGAN
Rajah tangan rajah saka Gusti pangeran
Ing kono wis tinulis Edi
tinatah pindha relief candi
Garis pesthi mring lelakon ing alam donya
Lair
jodho
rejeki
lan pati
Manungsa mung wenang mbudidaya
Nyadhong kawelasan sihing Gusti kang maha kuwasa
37.
ATI KANG EKLAS
Sapa nandur bakal ngundhuh
Sapa ngamal bakal nampa beja
Sedaya sampun tinata dening GUSTI
Senajan Ing kalane ora klebu ing nalar
Bab kanugrahan pancen sarwa ndilalah
Sadawane lurung puja lan puji
Ndremimil tanpa leren
Nyuntak rasa syukur
Marang GUSTI ingkang maha wikan
Kang wus Paring kanugrahan tanpa dinuga
Mbokmenawa titah ing alam donya
Sewu siji sing bisa nyipati
Sewu siji sing bisa nglakoni
Sewu siji sing tanggap sasmitaning Gusti
Dhuh..ati
Muga tansah bisa ngemong rasa
welas asih lan amanah mring sesami
Kanthi iklas lan legawa
Sejatine samubarang sing sinebut kelangan Kuwi Dudu mbuwang Nanging nandur
Dudu nggayuh Nanging ngundhuh kabagyan ing tembe mburi
Ilining kanugrahan tuwuh saka pakerti
Ati kang resik lan patrap kang becik
Tansah Sumendhe marang ridhoning GUSTI ...
Aamiin ya robbal alamin
39.
AJA KANDHA YA..?
Kijenan ing lurung sepi
Pepayon gegodhongan asri
Mecaki lelakon kang sinandi
Marang semilir angin
Aja kandha sapa-sapa ya?
Yen ing kene
Aku lagi nandhang kapang
Marang panjenengane ing tebih kono
daktulis asmane ing kekayon
Dadiya prasasti kang peni
Tinatah edi jroning ati ...
38.
KARI KENANGAN
Dakgambar maneh wewayanganmu
Kumlawe ing antarane tletik udan
Kumlebat Rupa jenar merak ati
Dakranggeh kanthi kebak pengarep
Aku kang nandhang dhuhkita
Katrem jroning angen-angen
Tanpa ngerti wayah
Isih daksimpen sakebehe crita
Senajan mung kari kenangan
Gojekmu ing tritis awan
Maesi lumakune dina sapungkurmu
Nyancang rasa tan bisa obah
Anjalari kahanan katon alum
Kusem tan ana cahya babar pisan
Nalika Kijenan ing madya ratri
Hawa adhem nunjem jiwa
Driji srawehan ngusap banyu netra
ngampah geter kapang jroning dhadha
Kang winungkus wirang rasa
42.
GURIT KATUR SIMBAH
Ing peteng lelimengane nala
dakjejegake pangrasaku
kang dhoyong mentiyung pating sembyah
ing parak esuk iku minangka seksi
ing antarane kumandhange adzan subuh
dakumbulna sekabehane donga
dakiring kanthi iklas
simbah sing daktresnani titiwanci sowan Ngarsaning Gusti..
Senajan Luh kuthah tanpa kabendhung
Uga ringkihing batin iki
Isih dakranggeh kekendelan
ngenam sewu kapitayan
ing sela-sela palereman
Nganti temeka Saiki kala-kala udan ngreceh wayah wengi
lan panas sing kadhang sinunggi isih kelingan edhume katresnan simbah
Dak gegem raket
Kabeh pituturmu
senajan kaya njlumati dom ing tumpukane damen
Wengi Iki pengin dakgurit
saka keteg jantung iki
Saka tetesing luh kang tulus Iki
ing antarane donga pamuji
Uga Rapal maneka Donga puji
Nepaki ing sasi lunga Simbah
Kelingan durung rampung atur leladi
geneya panjengan wis ora kersa..?
mbokmemawa raga sepuh wis sayah...
Ing sepi wengi
isih dakugemi sekabehing pitutur
kanggo mbacutake lakuku
minangka piyandel sekti
Nuntun mecaki lurung panguripan
Amrih tanggap mring mayuta sasmita
Sugeng Sare ingkang taneg mbahyut....
katresnan putra wayah tansah mili
uga donga -. donga pamuji
mugi panjengan mapan ing swarganig Gusti
Aamiin yaa robbal alamin
Kangen mbahyut
KENANGAN ,270816
[27/9 12.35] Lestari Sahsa Malika: 40.
OMAH CEKLI LAN ASRI
Kidul kae ing pinggir kali
Ana omah cekli lan asri
Papan palereman aku sakulawarga
Rasa tentrem
Pepayon agrom ijo papringan
Aweh pangayoman saka panas lan udan
Omah cilik kang dakgawe saka kuwating rasa
Kang dakrakit udakara selawe taun kapungkur
Ngajab kasantosan temeka kaken ninen
Bagya mulya tansah kasalira
Tan kendhat anggonku memuji
Ing siyang lan ratri
mugi Gusti ALLAH Tansah paring kanugrahan lan amberkahi
Aamiin yaa robbal alamin...
41.
Kijenan tanpa rowang
Jroning sepine wengi
Apa ta sing lagi dakrasa iki?
Ati tansah klisikan
Molak malik tan kuwawa muni
Apa iki dayane ati kepranan?
Marang panjenengan kang lagi wae tambuh
Lewat endahe ukara kang rinonce
Pawongan kang sarwa linuwih
Ora mung kaprigelan nata endahe bait gurit
Ning uga jatmika ing jati dhiri
Kang mbabar hambeg tama alusing pambudi
Yagene....tansah sesonderan ing kedhep netra
Njur ngebaki impen-impenku?
Kamangka durung nate wanuh
Sedina wae ora sapa aruh
Rinasa setaun suwene anganti
Nanging ora ....
Iki mbokmenawa wae mung aku dhewe
Sing gedhe rumangsa
Senajan critaku lan critamu
Deres gemrajag ing sangisore pengarep
Iki Kabeh bakal daksimpen ing lempitaning ati
Mbokmenawa mbesuk kena kanggo tamba
Nalika kapang
Lan panjenengan uga wis awis sambang
Ya mung pawartamu tansah dakantu
Ing tritis awan lan dalu..
43.
KESAGUHAN ATI
Iki gurit sing dakkirim lumantar e-mail
Saka adrenging pepinginan ngrakit endahing memitran
Wacanen ing Tritis sore
kanthi rena ing rasa
senajan amung rupa tembung ampang tanpa isi
Nanging takundhuh saka dhuwure anggit
Pindha ngranggeh Cahya rembulan wanci dalu
Betheke mung nyilih satlenik sunare
Dimen madhangi margi anuju laladan kene
Nglewati praupan lan netra kebak pitakonan?
Kanthi mlipir-mlipir daksengkut jangkahku
Saka wiwitan wis maca bismillah
Daktulis reroncen ukara tharik-tharik
Muga wae ing watu-watu taman kang asri
Ora ana panggrahita sepa
Senajan durung entha
Ning Kesaguhan ati iki
wis nuntun driji kudu bisa?
Ngungkal pakerti lelandhesan greged
ing kene daktemu weninging rasa
Bebarengan njaga endahing sastra jawa
Dimen tansaya ngrembuyung lan ngrembaka.
44.
KIDUNG KANGEN
Semilir angin anelah sepi
Deleg-deleg kijenan Ngudari reribeting ati
Swaraning batin dumeling ngranuhi
Kelingan panjenengan ing Tebih paran
Yagene saiki ilang tanpa warta?
Kidung kangen sing dakronce
Amung dadi panglipur cuwaning ati
Kaya lintang panjer rina
Wewayanganmu manter ing punjering sukma
Ing kene isih dakantu tekamu nganti ora ngerti wayah
Esemmu kang ngujiwat
Tansah Dremejeg ing larikan idep
Prasasat cahya semburat ing langit ati
Nuwuhake pepadhang ing jiwa
Marang ati kang nandhang kapang
Pengangen nganti konjem
Nggagas panandhanging jiwa
Apa iki dayane ati kapang?
Marang sorot netra kang merak ati
Pindha Keli ing tlaganing madu retna
Kebak sih palereman ing rasa
Aku ora bisa selak marang rasa iki
Solah bawa tan ginawe nglegganaing ati Sesonderan ing gisik kalbu
gedhe pangarep-arepku
Senajan mung bisa sapetemon jroning impen
Iki lho...gelang alit mripat biru
Isih kumanthil ing drijiku
jare biyen tandha tresnamu💕
45.
GURIT PITAKONAN
Sisih etan regejegan
Sisih kulon pating bleber
Endi papan padha umeg sora
Mbuh apa sing dirembug?
Angin sumilir nyangking warta
Njur taksawang langit ndesaku
Ing sela-sela mega dakcantelake gurit pitakonan
Ing Ketiga dawa akeh lemah sawah nela
Hawa panas sumelet nembus dhadha
Ujaring kandha
jare wis lumrah lan dudu wadi maneh
Sapa wae dikeparengake nyuwara
Pambengoke nganti njebolna rasa
Wis ambrol ngebaki dalan-dalan
Manjila watu-watu lancip kang mbilaheni
Samangsa bisa natoni sapa wae sing nglewati
Suket teki ora kober semi
Ing sangisore sikil kedhungsangan
Jalaran batin lan pikir wis umub
Ngetut laku kang kasurung gedhene ambisi
Wis enggal padha lereme sauntara
Enggal asuh salira
ing wening rasa
Donya mono pancen akeh wong pinter
Ning mbokya sing eling
Aja seneng nerak angger-angger
Apa wis padha nyingkur ing bebener ?
Apa ya amung winates ing endahe pitutur
Lamun ing kanyatan padha keblinger?
46.
DAHANA ING DHADHA
Mecaki lurung wektu
Mangsa katiga ngerak
Anane mung panas ngalad-alad
Urubing dahana mapan ing dhadha
Tansaya mbulat-bulat Ngegla ing netra
Lan obahing lathi tan bisa sinaring
Sawayah Ngobong alusing budi pakerti
Lali marang luhuring jati dhiri
Lumantar Reroncen kembang pikir
Mbaka siji daktlateni
Mring jembaring tawang
Lilanana aku methik mega kae
Dhampyak-dhampyak ing langit biru
Rupa putih rinengga angsluping surya
Amrih bisa aweh Suluh mring ati alit iki
Senajan Ing kalane mendrip-mendrip
Keterak tumiyubing samirana kang santer
Tansah Dakramut kanthi sagegem kapitayan
Amrih sumunar ing obahe jaman
Kandhamu....
Ilining jaman kemajuwan
Akeh sing wis kelangan Edining pakerti
Akeh wong pinter malah keblinger
Tanpa mikir yen ing tembe nemahi wirang rasa nggegirisi
Butuhe uripe mulya kinemulan bandha donya
Kamangka samubarang laku kudu mlaku ing dalan bener.
47.
KALUHURAN PAKERTI
Manungsa iku kejaba wujud badan wadhag
Uga duweni pancadriya lan osiking ati
Kabeh mau kudu bisa kompromi kanthi apik
Murih ginayuh karahayuning urip
Polah lan tingkah nut swara ati nurani
Aja nganti laku ngiwa padhatan iku kliru
Mula penting banget bisa ngrungokake osiking ati
Guneman sethithik saperlune wae
Ora usah meksa kaanggep pinter
Samubarang dadi omongan lir tong kosong
Becike nengenake kaluhuran pakerti
iku kang tumrape urip bebrayan
bisa aweh katentreman lan rasa adhem
kang gedhe tumrap wong sing gelem mikir?
Omong sakecap tembung saklemah
Kudu dipikir dhisik sadurunge kawetu
Awit yen mung kadereng rasa serik
Lan panase ati kang kebrongot nesu
Bisa nuwuhake katiwasan kang drawasi
Gedhene bisa getun keduwung
Pungkasane ngrubedha katentreman batin
merga keprucut omong sing ora patut
Sanalika pancen bisa aweh pamarem
Jroning ati kang lagi srengen
Bisa nguntapake dayaning hawa nafsu
Marang wong sing dianggep gawe gela
Nanging samangsa lerem atine
Bakal getun lan balik nutuh marang dhiri pribadhi
Yen satemene mung mbuwang energi
Kang Tanpa ana gunane..
48.
JAMAN KEMAJUWAN
Mripat-mripat pating plirik
Apa padha ngupadi sisik melik?
Ora preduli sinempyok bledhug panas
Nempes ing sakujur angga
isih adreng ngoyak tujuwan
Rasa pangrasa malih atos
Tanpa tedheng aling-aling
Ing endi papan
Ing endi wayah
Keprungu umeg regejegan
Rerembug saru
Adu argumentasi
Datan ana pungkase
Horeg padha sesumbar
njalari girising ati
urip iku peparing adi
Ing alam bebrayan iki
Samubarang bisa lumaku kanthi becik
Amerga ana tatanan lan paugeran
Kang dadi pedhoman ngaurip
Duweni tekad lan sesanti kang luhur
Iku apik lan dikeparengake
Uga Tansah sengkut ngisi obahe majuning jaman
Sinartan rasa bombong Lan melu andarbeni
Marang kabudayan lan adat tradhisine dhewe
Para pangarsa uga nyengkuyung
Amrih LOCAL GENIUS/kabudayan lokal
Tansaya ngrembuyung
Bisa dadi titikane bangsa kang maju
urip tansaya maju
Kagawa jaman modern
Ora ateges ninggalake pitutur becik
Samubarang laku kudu nut paugeran
jaman kebebasan aja nganti kebablasan
Mesthine kena kanggo sangu
Ngadhepi kahanan sing sarwa instan
Supaya ora ilang watak lan jati dhirine
Minangka wong jawa kang misuhur
Duweni pakerti lan tradhisi kang luhur
49.
GEBYOK KACA
Sesrawungan ing jagad Maya
Pindha mapan ING sajroning omah
Kang wis ora duweni senthong
Tanpa tedheng aling-aling
Kanggo ndhelikake apa wae
Kabeh Sarwa trawaca
Lan cetha wela-wela
Ora ana papan nyimpen wadi
Lan sisik Melik
Jalaran saka gebyok kaca Wening Iki
Lathi wis dadi mripat
Mripat wis dadi kuping
Ala lan becik
Ngawe-awe tanpa sungkan
Muga wae kita bisa metik
Kembang kang ganda Arum
Saka sakehing kembange jaman
Aja nganti nglirwaake paugeran bebrayan.
*Kapacak ing buku gebyar kasusastran BBJT 2016
50.
RERESIK
kakang kawah Adhi ari-ari
Rewangana aku methik kembange rasa
Saka pang-pang panguripan
Aku kang kebak rereged
Cacating Seiya
Cacating suksma
Semendhe ing pojok batin
Tansah daksapu esuk sore
Tansah dakelap awan bengi
Nanging kepiye Anggonku ngresiki?
Sapu nyangking awu
Elap nggembol reged
Bismillah...
Allah Kuwat- kuwata
Kinanthi Donga suci
Niyat ingsun reresik ati
Methik kembang ganda wangi
Ing madyane alas lathi.
*
Kapacak ing buku gebyar kasusastran BBJT 2016___
#####################
BIODATA PANGRIPTA
Lestari Sahsa Malika utawa sesingklon ing jagad kasusastran Denok Ayu Lestari
Lair ing Bojonegoro ,16 pebruari 1973
Seneng nulis ing sosmed lan blog
http://bundasahsa.blogspot.com
Aktif nulis rupa geguritan wiwit taun 2010 lan saperangan wis kapacak ing majalah basa jawa.
Lelumban ing jagad sastra lan dadi anggota PSJB
lan sanggar AJAR GURIT.
Bukune,antologi geguritan karya bareng-bareng
1. GEBYAR KASUSASTRAN
penerbit balai bahasa jawa timur 2016.
2.RERONCEN GURIT
penerbit Paguyuban Ajar Gurit
3. KEMBANG SETAMAN
penerbit Pamarsudi sastra jawa Bojonegoro 2018
4.KEMBANG NEDHENGE MEKAR
5.SANGU LELADI @BUNDA SAHSA
6.PASAR PATLIKUR JAM
penerbit paguyuban ajar gurit
7.CATATAN PERJALAN BUNDA SAHSA
8.KUMPULAN BAIT PUISI
*
Pendidikan sekolah sing dirampungake
Yaiku :
SDN SIDOBANDUNG 1 lulus taun 1985
SMPN BALEN lulus taun 1988
SMEAN BOJONEGORO lulus taun 1991
Nganti seprene mapan ing desa NGADILUHUR kec.Balen Bojonegoro.
HP : 081252741804
